Parlamenti Evropian miraton rezolutën për Shqipërinë me 483 vota pro, Balla: Vlerësim i madh i progresit solid të Shqipërisë në rrugën e anëtarësimit në BE

Parlamenti Evropian ka miratuar me një shumicë të cilësuar votash Rezolutën vjetore për Shqipërinë. Lajmi u bë i ditur nga kryetari i grupit parlamentar të Partisë Socialiste, Taulant Balla, përmes një njoftimi në rrjetet sociale. Ky votim në institucionin ligjvënës të Bashkimit Evropian vlerësohet si një sinjal i rëndësishëm mbështetjeje për ecurinë e procesit të integrimit të vendit.

Sipas kreut të deputetëve të mazhorancës, ky vendim përbën një certifikim të reformave shtetformuese të ndërmarra nga Tirana zyrtare.

“Ky vendim i sotëm i përfaqësuesve direkt të qytetarëve evropianë është një vlerësim i madh i progresit solid të Shqipërisë sonë në rrugën e anëtarësimit në Bashkimin Evropian.”, shkruan Balla.

Dokumenti mori një mbështetje të gjerë politike gjatë seancës plenare, duke siguruar 483 vota PRO. Ky rezultat reflekton një konsensus pozitiv midis familjeve kryesore politike në Parlamentin Evropian sa i përket ecurisë së Shqipërisë në kuadër të kritereve të anëtarësimit.

Përmes mesazhit të tij, Balla shprehu mirënjohjen për eurodeputetët që u rreshtuan në favor të rezolutës, duke veçuar dy përfaqësuesit e angazhuar drejtpërdrejt me hartimin e këtij dokumenti Andreas Schieder, raporteri për Shqipërinë nga Grupi i Aleancës Progresive të Socialistëve dhe Demokratëve (S&D) në PE, njëherësh hartues i tekstit të Rezolutës dhe Andrey Kovatchev, raporteri për Shqipërinë në kuadër të Grupit të Partive Popullore Evropiane (PPE).

“Faleminderit të gjithë anëtarëve të Parlamentit Evropian që votuan në mbështetje të së ardhmes evropiane të Shqipërisë. Një falënderim i posaçëm për hartuesin e Rezolutës Raporterit për Shqipërinë Andreas Schieder, Grupi i Socialistëve dhe Demokratëve në PE gjithashtu edhe për Andrey Kovatchev, Raporter për Shqipërinë në Grupin e Partive Popullore Evropiane”, shkruan Balla.