Pas 17 vjetësh, ICAO nis kontrollin e aviacionit civil maqedonas

Pas një pauze prej 17 vjetësh, një ekip inspektorësh të Organizatës Ndërkombëtare të Aviacionit Civil (ICAO) ndodhet në Maqedoninë e Veriut për të kontrolluar përputhshmërinë e aviacionit civil vendas me standardet dhe rregullativat më të reja ndërkombëtare, siç njofton Agjencia për Aviacion Civil. Ekipi ka mbërritur dje dhe kontrolli do të zgjasë dy javë.

Sipas Agjencisë për Aviacion Civil, e cila e ka ftuar ekipin e ICAO-s, ky proces është një mundësi e rëndësishme për një vështrim të pavarur dhe objektiv të gjendjes në aviacionin civil, për vlerësimin e zbatimit të kërkesave ndërkombëtare dhe për identifikimin e fushave ku nevojiten përmirësime të mëtejshme. Siç raporton edhe Centar.mk, inspektimi ka filluar më 11 nëntor dhe është i pari i këtij lloji pas 17 vjetësh.

Drejtori i Agjencisë për Aviacion Civil, Dragi Stojanoski, ka theksuar se hapja ndaj një kontrolli të pavarur dhe të paanshëm është pjesë e rëndësishme e menaxhimit të përgjegjshëm dhe e ndërtimit të një sistemi aviacionor të fortë e të besueshëm. Sipas tij, inspektimi i pavarur është mënyra më e mirë për të vlerësuar sa me sukses kryhet puna dhe ku mund të bëhen përmirësime të tjera.

Rekomandimet e inspektimit, siç njofton Agjencia, do të jenë bazë e rëndësishme për planifikimin e aktiviteteve të ardhshme dhe për ngritjen e mëtejshme të sigurisë në aviacionin civil, ndërsa gjetjet përfundimtare do të dihen pas mbylljes së kontrollit dyjavor.