Pas dy fitoreve në Kushtetuese, Veliaj i drejtohet Strasburgut! Avokatët e huaj: Më 10 shtator…

Avokatët e huaj të kryebashkiakut të Tiranës, Erion Veliaj, pritet t’i drejtohen Gjykatës Evropiane për të Drejtat e Njeriut në Strasburg lidhur me arrestimin dhe qëndrimin e tij në paraburgim.

Sipas burimeve, ekipi ndërkombëtar i mbrojtjes së Veliajt i ka paraqitur SPAK-ut një kërkesë për zhvillimin e një takimi të dytë me të më 10 shtator. Takimi lidhet me procedurat që po ndiqen për dërgimin e çështjes në Strasburg, pasi Veliaj duhet të firmosë dokumentacionin përkatës për ankimin.

Avokatët e huaj synojnë të kundërshtojnë në Gjykatën e Strasburgut masën e arrestit ndaj kryebashkiakut të Tiranës, duke e zhvendosur kështu betejën ligjore edhe në nivel ndërkombëtar.

Lëvizja vjen pas dy vendimmarrjeve në favor të Veliajt në Gjykatën Kushtetuese, të cilat lidhen me çështje të ngritura prej tij gjatë betejës ligjore.

Më 10 shtator pritet që avokatët të zhvillojnë takimin me Veliajn dhe, pas firmosjes së dokumenteve të nevojshme, të vijojnë procedurat për paraqitjen e çështjes përpara Gjykatës Evropiane për të Drejtat e Njeriut në Strasburg.