PDK largohet nga Komisioni për Mbikëqyrjen e AKI-së, kërkon procedimin e Ligjit për Specialen

Deputetët e Partisë Demokratike të Kosovës janë larguar sot nga mbledhja e Komisionit për Mbikëqyrjen e Agjencisë së Kosovës për Inteligjencë (AKI), menjëherë pas konstituimit të tij, duke kërkuar që në Kuvend të procedohet sa më parë plotësim-ndryshimi i Ligjit për Dhomat e Specializuara të Kosovës, siç njofton KosovaPress.

Deputetja e PDK-së, Besa Kabashi, deklaroi se konstituimi i institucioneve është i rëndësishëm, por “prioritet mbi prioritetet” është Ligji për Dhomat e Specializuara. “Natyrisht si Parti Demokratike e Kosovës konsiderojmë që konstituimi i institucioneve është shumë i rëndësishëm, prandaj edhe ishim aty. Mirëpo jemi larguar nga ky takim pas konstituimit për shkak se për momentin për Republikën e Kosovës nuk ka ndonjë prioritet më të madh se sa procedimi i plotësim-ndryshimit të Ligjit për Specialen”, tha ajo.

Edhe deputeti i PDK-së, Rrahman Rama, e quajti ligjin “prioritet mbi prioritetet”. “Për neve si parti është prioritet mbi prioritetet ligji. Dhe ne nuk do të marrim pjesë në asnjë komision pa u kry ky ligj”, deklaroi Rama, duke shtuar se nëpër komisione të ndryshme të Kuvendit kanë ardhur shumë ligje, por prioriteti numër një, sipas tij, mbetet Ligji për Dhomat e Specializuara.

Nga ana tjetër, kryetari i komisionit, Bekë Berisha, u bëri thirrje deputetëve të kontribuojnë në tejkalimin e ngërçit institucional, siç raporton Klan Kosova. “Kisha lut gjithë deputetët ta japin kontributin e vet që ne të stabilizohemi e të kemi komisione të rregullta e parlament”, tha ai, duke vënë në dukje se afati për zgjedhjen e presidentit skadon më 6 tetor dhe se vendi rrezikon të shkojë sërish në zgjedhje.

Tërheqja e PDK-së nga Komisioni për Mbikëqyrjen e AKI-së vjen në vazhdën e bojkotit të shpallur të mbledhjeve të komisioneve parlamentare nga PDK-ja dhe AAK-ja, derisa të procedohet në Kuvend projektligji për ndryshimin e Ligjit për Dhomat e Specializuara.