Përplasje në distancë Tiranë-Beograd, Dhuka: E ardhmja evropiane ndërtohet mbi realitetin, jo fantazmat e së shkuarës

Debati mbi menaxhimin dhe rrjedhën e lumit Ibër ka nxitur një polemikë në distancë mes Tiranës dhe Beogradit, duke u zgjeruar në çështje të së drejtës ndërkombëtare, statusit të Kosovës dhe marrëveshjeve të Brukselit. Ministrja e Shtetit dhe Kryenegociatorja e Shqipërisë, Majlinda Dhuka, i është përgjigjur publikisht Ministrit të Integrimit Evropian të Serbisë, Nemanja Staroviç, pasi ky i fundit përdori metaforën e “kështjellës prej rëre” për të përshkruar argumentet mbi këtë çështje.

Në reagimin e saj, Dhuka thekson se debati që nisi teknikisht për ujin e një lumi, ka devijuar në interpretime selektive historike nga ana e Beogradit. Në cilësinë e juristes, kryenegociatorja shqiptare u shpreh se qasja e zyrtarit serb ndaj Rezolutës 1244 të Këshillit të Sigurimit të OKB-së është thelbësisht e mangët.

Sipas Dhukës, Rezoluta 1244 nuk e rivendosi sovranitetin serb mbi Kosovën, por vendosi një administrim ndërkombëtar, largoi forcat serbe të sigurisë dhe hapi rrugën për një proces politik, pa i paracaktuar rezultatet e tij. Ajo solli në vëmendje vendimin e Gjykatës Ndërkombëtare të Drejtësisë, e cila, pas kërkesës së vetë Serbisë, konfirmoi se shpallja e pavarësisë së Kosovës nuk përbënte shkelje të së drejtës ndërkombëtare.

Gjatë argumentimit të saj, Ministrja Dhuka hodhi poshtë çdo paralele të hequr mes situatës në Kosovë dhe asaj në Ukrainë, duke e cilësuar si të papërshtatshme dhe argumentues kundër vetë palës serbe, pasi “Kosova nuk u aneksua”. Ajo gjithashtu shfrytëzoi rastin për të rikonfirmuar pozicionin e shtetit shqiptar lidhur me fqinjësinë në rajon.

“Shqipëria nuk ka absolutisht asnjë pretendim territorial ndaj Serbisë, dhe as ndonjë agjendë për ndonjë gjë ‘Më të Madhe’, përveç një Evrope të Madhe,” theksoi Dhuka, duke bërë thirrje që “fantazmat” e Shqipërisë së Madhe dhe Serbisë së Madhe të dalin në pension.

Në lidhje me detyrimet ndërkombëtare, përfshirë Marrëveshjen e Brukselit dhe Asociacionin e Komunave me Shumicë Serbe, pala shqiptare nuk i vë në pikëpyetje këto detyrime, por kujton se ato kërkojnë reciprocitet të plotë nga të dyja palët.

Në përfundim të reagimit të saj, Dhuka e ktheu vëmendjen te pikënisja e këtij debati, duke theksuar se ideja që uji mund të përdoret si instrument presioni politik është e papranueshme. Ajo ftoi homologun e saj serb që gjeopolitikën ta ndajnë nga çështjet thelbësore jetësore dhe ta ndërtojnë të ardhmen evropiane mbi një themel të fortë, siç është pranimi i realitetit të ri në Ballkan.

Pikat kryesore të qëndrimit të ministres Dhuka: