Plagosja në Poliklinikën e Shkodrës, vëllai i 32-vjeçarit tentoi të vriste autorin e dyshuar, arrestohet nga policia

Konflikti i nisur në ambientet e Poliklinikës së Shkodrës rrezikoi të përshkallëzohej në një tjetër ngjarje të rëndë. Pas plagosjes me thikë të 32-vjeçarit Vildan Kepëca, vëllai i tij, Arben Kepëca, 41 vjeç, dyshohet se mori një armë zjarri pistoletë me fishek në fole dhe u nis për të vrarë autorin e dyshuar të sulmit.

Sipas të dhënave paraprake, gjatë ndërhyrjes së Policisë, 41-vjeçari tentoi të largohej dhe hodhi armën e zjarrit, por u neutralizua dhe u vu në pranga.

Ngjarja ndodhi rreth orës 11:30, në ambientet e brendshme të Poliklinikës në lagjen “Vasil Shanto”, ku, sipas policisë, pas një konflikti për motive të dobëta, shtetasi A. F., 18 vjeç, dyshohet se plagosi me thikë Vildan Kepëcën. I plagosuri u transportua menjëherë në spital, ku ndodhet nën kujdesin e mjekëve.

Ndërkohë, shërbimet e Policisë vijojnë kontrollet për lokalizimin dhe kapjen e autorit të dyshuar të plagosjes, 18-vjeçarit A. F.