Plani i shpenzimeve të qeverisë, kryeministri britanik premton 15 miliardë paund shtesë për mbrojtjen

Kryeministri britanik Keir Starmer ka njoftuar një financim shtesë prej 15 miliardë paundësh për mbrojtjen, në prag të publikimit të planit shumëvjeçar të shpenzimeve të qeverisë.

Në një fjalim, Starmer deklaroi se buxheti vjetor i mbrojtjes së Mbretërisë së Bashkuar do të arrijë në 80 miliardë paund deri në vitin 2029. Ai bëri të ditur se një pjesë e fondeve do të sigurohen përmes anulimit të disa projekteve rrugore dhe energjetike.

“Kur bota po armatoset dhe agresioni po rritet, mënyra më e mirë për të shmangur luftën është të përgatitesh për të”, u shpreh ai.

Plani i Investimeve në Mbrojtje parashikon 5 miliardë paund për zgjerimin e përdorimit të dronëve dhe armëve autonome nga forcat e armatosura. Gjithashtu, ai synon ta shndërrojë Marinën Mbretërore në një “marinë hibride”, duke kombinuar anije të vetëdrejtuara dhe teknologji të inteligjencës artificiale me flotën tradicionale, si edhe financimin e ndërtimit të gjashtë anijeve të reja luftarake.

Njoftimi ka ngjallur reagime nga opozita. Konservatorët e cilësuan planin “shumë të vogël dhe shumë të vonë”, ndërsa Demokratët Liberalë akuzuan qeverinë se “i ka lënë pas dore në mënyrë të rrezikshme forcat e armatosura”.