Konsumatorët amerikanë paguajnë më shumë se kushdo në botë për karburantin e shtrenjtuar nga lufta me Iranin

Konsumatorët amerikanë po paguajnë më shumë se kushdo tjetër në botë për rritjen e çmimeve të karburantit të shkaktuar nga ndërprerjet e furnizimit prej luftës së SHBA-së kundër Iranit, përfshirë mbylljen virtuale dhe më pas bllokadën e Ngushticës së Hormuzit, thuhet në një studim të publikuar të hënën, siç njofton Reuters. Sipas studimit, që nga fillimi i luftës më 28 shkurt, një konsumator amerikan ka paguar mesatarisht 471 dollarë më shumë për karburantin e shtrenjtuar, krahasuar me një mesatare prej rreth 60 dollarësh për banorët e pjesës tjetër të botës.

Studimi u krye nga Centre for Research on Energy and Clean Air (CREA), një organizatë jofitimprurëse me qendër në Finlandë, e cila mbështet përpjekjet për t’u larguar nga lëndët djegëse fosile. Sipas CREA-s, amerikanët paguajnë më shumë për shkak të varësisë nga automjetet private më pak efikase në konsum, distancave më të gjata të udhëtimit dhe kalimit relativisht të ngadaltë drejt automjeteve elektrike. Përllogaritja u bë duke krahasuar çmimet e karburantit në janar dhe shkurt të këtij viti me çmimet gjatë pjesës tjetër të vitit.

Në shkallë globale, bota ka paguar 468 miliardë dollarë shtesë për karburant nga fillimi i marsit deri në mes të tetorit, periudhë që mbulon studimi i kryer në 169 vende. Nga kjo shumë, SHBA-ja mban barrën më të madhe me 160 miliardë dollarë, e ndjekur nga Kina me 54 miliardë dhe Kanadaja me 17 miliardë dollarë. Shuma dukshëm më të larta se mesatarja globale kanë paguar edhe konsumatorët në Kanada, Australi, Zelandën e Re dhe Belgjikë.

Administrata e presidentit Donald Trump thotë se çmimet më të larta të karburantit janë një kosto e vogël për konsumatorët në këmbim të ndalimit të Iranit nga pajisja me armë bërthamore dhe se çmimet e naftës dhe të karburantit do të bien kur lufta të përfundojë. Megjithatë, siç vëren studimi, lufta ka zgjatur më shumë nga sa kishte parashikuar administrata, dhe fatura e saj po e ndiejnë çdo ditë shoferët amerikanë në pompat e karburantit.