Polemika të ashpra në Orën e kryeministrit: Kneževiqi i thotë Spajiqit “uleni entuziazmin për Vučiqin, u gjunjëzuat e pritët në radhë”

Kryeministri i Malit të Zi, Milojko Spajiq, u përgjigj të enjten pyetjeve të deputetëve në seancën e posaçme të Kuvendit kushtuar Orës së kryeministrit, ku në qendër ishin integrimet evropiane, marrëdhëniet me fqinjët, rritja e çmimeve, standardi i pensionistëve dhe projektet infrastrukturore, siç njofton Verige.

Në hapje të seancës, Spajiq deklaroi se ka ardhur një kohë e re për marrëdhëniet e Malit të Zi me Serbinë dhe se qeveria i mirëpret mesazhet që vijnë nga Beogradi në këtë drejtim. Ai theksoi se Mali i Zi është shteti më i vogël në Ballkan dhe prandaj ka detyrim të veçantë të kujdeset për marrëdhëniet e mira fqinjësore, duke shtuar se sot Mali i Zi është shtet qytetar ku askush nuk duhet të ketë turp për përkatësinë e tij identitare.

Polemika më e ashpër u zhvillua me liderin e Partisë Demokratike Popullore, Milan Kneževiq, i cili e pyeti kryeministrin se si e komenton deklaratën e komisioneres evropiane për zgjerim, Marta Kos, e cila i krahasoi qytetarët malazezë me dele dhe Malin e Zi me një kope. “Ulni pak entuziazmin kur bëhet fjalë për Vučiqin; u gjunjëzuat dhe pritët në radhë”, i tha Kneževiqi, duke shtuar se do t’i thotë vetë komisioneres Kos: “Turp t’ju vijë, ne nuk jemi dele”.

Deputetët e mazhorancës dhe të opozitës shtruan pyetje edhe për gjendjen e negociatave me Bashkimin Evropian dhe marrëdhëniet me Kroacinë, për përdorimin e banesave dhe kredive shtetërore si instrument privilegjimi të gjyqtarëve e prokurorëve të zgjedhur, për rënien e standardit jetësor të pensionistëve dhe për formimin e organit koordinues strategjik për kontrollin kombëtar të fluturimeve.