Pochettino apo Deschamps, trajneri i ri i Real Madridit? Zgjedhja përcaktohet edhe nga… Mbappé

Sezoni i Real Madridit po shkon drejt një mbylljeje zhgënjyese, me shumë gjasa pa fituar as La Liga dhe as Champions League për të dytin vit radhazi. Kjo situatë mund të sjellë ndryshime të mëdha në stol, ku pozicioni i Álvaro Arbeloa duket gjithnjë e më i pasigurt.

Sipas “Radio Marca”, drejtuesit madrilenë po shqyrtojnë të ardhmen dhe kanë një kandidat favorit; Mauricio Pochettino: “Deri më 21 prill, Pochettino është kandidati më serioz për t’u bërë trajneri i ardhshëm i Real Madridit. Është një profil i jashtëzakonshëm dhe e njeh shumë mirë frymën e klubit”.

Ish-trajneri i Tottenham dhe PSG konsiderohet ideal për të nisur një cikël të ri, falë aftësisë për të menaxhuar skuadra me shumë yje dhe presion të lartë. Megjithatë, në vendimin final mund të ndikojë edhe dhoma e zhveshjes, veçanërisht Kylian Mbappé.

“Mbappé mund të luajë rol vendimtar në zgjedhjen e trajnerit. Ai njeh si Didier Deschamps, ashtu edhe Pochettino, që janë kandidatët më të fortë”, – thekson mediumi në fjalë. Sulmuesi francez mund të ndikojë indirekt në vendimin final të klubit.