Presidenti i Iranit: Ne nuk kërkojmë të marrim armë bërthamore

Presidenti i Iranit, Massoud Pezeskian ka deklaruar se vendi i tij ishte i gatshëm të siguronte botën se nuk kërkon armë bërthamore. Mediat shkruajnë se presidenti tha se Irani nuk dëshiron paqëndrueshmëri rajonale, ndërsa shtoi se regjimi Izraelit kërkon të destabilizojë rajonin.

Presidenti iranian theksoi se ekipi negociator iranian nuk do të bëjë kompromis për nderin dhe dinjitetin e vendit të tyre.

“Para martirizimit të Ajatollah Khamenei. Ne kishim deklaruar, dhe e përsërisim tani, se jemi të gatshëm të sigurojmë botën se nuk kërkojmë armë bërthamore”, shkroi Pezeskian në rrjeteet sociale.

Më herët, presidenti amerikan Donald Trump u shpreh se arritja e një marrëveshjeje me Iranin varet vetëm nga ai, ndërsa theksoi se nuk bën marrëveshje të këqija. Gjithashtu Trump u tha diplomatëve të tij të mos nxitojnë për një marrëveshje, pasi koha është në anën e SHBA-së dhe bllokimi do të mbetet në fuqi.