Projekti për Kalanë e Elbasanit, Gonxhja: Parashikon ndërhyrje për përmirësimin e hapësirave publike dhe rijetëzimin…

Një projekt për Kalanë e Elbasanit , i cili siç bëhet me dije synon rikualifikimin, rijetëzimin dhe menaxhimin e qëndrueshëm të saj. Projekti për Kalanë e Elbasanit u prezantua këto ditë, ku ministri Blendi Gonxhja shprehet se një vizion i ri për Kalanë e Elbasanit po merr formë. Blendi Gonxhja ministër i Turizmit, Kulturës dhe Sportit thotë se projekti i rivitalizimit të Kalasë së Elbasanit synon të rikthejë identitetin historik dhe vlerat arkeologjike të saj, duke e transformuar në një destinacion të rëndësishëm kulturor dhe turistik.

Ai gjithashtu thekson se ndërhyrjet e integruara synojnë përmirësimin e hapësirave publike dhe zhvillimin e potencialit ekonomik dhe kulturor të qytetit përmes kalasë. “Ky ishte prezantimi i parë zyrtar i projekt-idesë që synon transformimin e Kalasë në një destinacion të rëndësishëm kulturor dhe turistik, duke i rikthyer identitetin historik, vlerat arkeologjike dhe rolin e saj në jetën e qytetit. Projekti parashikon ndërhyrje të integruara për përmirësimin e hapësirave publike, zhvillimin e potencialit turistik dhe rijetëzimin e zonës historike, me synimin për ta kthyer kalanë në një motor të ri zhvillimi ekonomik dhe kulturor për Elbasanin”, shprehet Gonxhja në rrjete sociale. Arkitekti Emre Arolat së bashku me MVM Architecture prezantuan projektin e rivitalizimit të Kalasë së Elbasanit në praninë e kryeministrit Edi Rama, kryetarit të Bashkisë Elbasan, Gledian Llatja dhe bashkëdrejtuesve të AADF, Martin Mata dhe Aleksandër Sarapuli. Gonxhja shprehet se pas këtij prezantimi, pritet rakordimi institucional dhe ndjekja e gjithë procedurave deri në miratimin final të projektit.

“AADF financon hartimin e projektit ,duke sjellë ekspertizë nga artitektë të mirënjohur nga bota dhe Shqipëria”, thotë Gonxhja. IKTK, Bashkia Elbasan dhe Ministria e Turizmit, Kulturës dhe Sportit, sëbashku me AADF dhe FSHZH do të ndjekin zbatimin e plotë.