Prokurori special, Drejtësia cakton zyrën e Janevës

Ministria e Drejtësisë ka propozuar vendndodhjen e mundshme për vendosjen e prokurores dhe ekipit të saj, ashtu siç parashikonte ligji. Në bazë të propozimit të ministrisë së drejtësisë, Prokuroria Speciale mund të vendoset në godinën që shfrytëzonte deri tani, Agjencia për Rini dhe Sport, në rrugën “Aradhat Partizane” në Shkup. Objekti i propozuar ende nuk është konfirmuar nga prokurorja Janeva. Nga Ministria e Drejtësisë thonë se janë ende në pritje të konfirmimit.

Ndërkaq, në një intervistë televizive Prokurorja Janeva ka garantuar hetimin korrekt dhe adekuat jo vetëm për përgjimin, por edhe raste të tjera që do të bien në kompetencë të saj.

“Secila fjalë që do të hyjë në atë prokurori speciale, do të analizohet në mënyrë adekuate ligjore. Pres një përkrahje të madhe ndërkombëtare, në zbulimin e gjendjes faktike. A do t’i pëlqejë ajo dikujt ose jo, do t’ia lëmë kohës, dhe do e shohim”, deklaroi Katica Janeva, Prokurore Speciale.

E pyetur mbi njohjen me kryeprokurorin aktual publik Marko Zvrlevski, Janeva pranoi se ka njohje vetëm profesionale, që nga viti 2009. Për të filluar zyrtarisht punën, Prokurorja Janeva duhet që në një afat prej 30 ditësh të dorëzojë planin financiar dhe personelin e saj, të cilët pritet të miratohen gjithashtu brenda afatit 35 ditë nga dita e emërimit të saj.