Prokurori Special kërkon të marrë në pyetje Trump
Avokatët e Donald Trump po zhvillojnë negociata me hetuesit që duan të intervistojnë presidentin amerikan si pjesë e një hetimi të departamentit të drejtësisë.
Gazeta “The Washington Post”, duke cituar një burim anonim pranë Trump, raporton se besohet që prokurori special Robert Mueller do të intervistojë Trumpin brenda disa javësh. Ekipi ligjor i Trump nuk i ka konfirmuar këto lajme, por në të shkuarën raportime të tilla mediatke, sidomos për presidencën Trump, kanë pasur tendencën të jenë të vërteta.
Robert Mueller, ish drejtor i FBI-së dhe tashmë prokuror i angazhuar enkas, po heton bashkëpunimin e mundshëm mes fushatës Trump dhe Rusisë. Tensioni mes Trump dhe Mueller është rritur jo pak qëkur hetuesit sollën akuzat e para ndaj disa ish anëtarëve të fushatës Trump. Sipas “Washington Post”, Mueller e përmendi së pari mundësinë për të intervistuar presidentin në fund të dhjetorit.
Burimi anonim i gazetës thotë se hetimi po lëviz shumë më shpejt se sa mendojnë njerëzit dhe se avokatët e Trump nuk duan që ai të intervistohet ballë për ballë nga Mueller, por po shohin mundësinë që të japë përgjigje me shkrim për disa pyetje. Ajo që duket e sigurt, të paktën sipas mediave amerikane, është se hetuesit duan të marrin në pyetje presidentin. Sa do të ndodhë, mbetet për tu parë.
