Promovimi i turizmit, Shqipëria u rikthehet reklamave në mediat ndërkombëtare, 220 mijë USD për 15 ditë

Strategjitë e promovimit të Shqipërisë turistike kanë pësuar luhatje vit pas viti. Shumëkush mban mend spotin e famshëm në CNN të realizuar në kohën e qeverisjes së djathtë, i cili ngjalli diskutime që nga personazhet e përzgjedhur e deri tek sekondat e kripura për të cilat KLSH bëri kallëzime penale.

Me ardhjen e qeverisë Rama 1, fokusi për promovimin e turizmit ishte krejt i ndryshëm dhe i orientuar në dy drejtime. Së pari ishin media- turet, pra gazetarët e huaj që ftoheshin në Shqipëri për ta njohur nga afër vendin tonë dhe së dyti pjesëmarrja në panaire, që arriti numër rekord për institucionet e përfshira direkt në turizëm me më shumë se 13 panaire në vit.

Por duket se qeveria ka vendosur që të plotësojë pjesën e promovimit me spote në mediat ndërkombëtarë dhe jo në një por dy të tilla për një periudhë dyjavore me një fond limit prej 220 mijë dollarësh. Referuar një procedure të çelur së fundmi nga Agjencia Kombëtare e Turizmit (AKT) kërkohet që të gjithë mediat e interesuara ndërkombëtare të shfaqin interes “në kuadër të promovimit të Turizmit shqiptar me fond limit 25.000.000 (njëzetë e pesë milionë) lekë pa TVSH, vënë në dispozicion nga buxheti i shtetit. Ofertat duhet të paraqiten për secilën nga opsionet e mëposhtme.  

1. Transmetim spoti në dy media ndërkombëtare të mirënjohura të specializuara në fushën e turizmit dhe që prek një gamë të gjerë të publikut Europian (kontinent). Spoti që do të transmetohet është 30 sekonda.

Në këto televizione spoti duhet të shfaqet jo më pak se 200 (dyqind) herë në harkun kohor 17/12/2017 deri 31/12/2017 në të dy televizionet. Transmetimet në prime-time do të jenë jo më pak se në masën 50%.

 2. Transmetimin në 2 media të mirënjohura ndërkombëtare të specializuara në fushën e informacionit dhe që prek një gamë të gjerë të publikut Europian (kontinent). Spoti që do të transmetohet është i gjatë 30 sekonda.

Në këto televizione spoti duhet të shfaqet jo më pak se 40 (dyzet) herë në harkun kohor 17/12/2017 deri 31/12/2017 në të dy televizionet. Transmetimet në prime-time duhet të jenë jo më pak se në masën 25%.

AKT bën me dije se në vlerësimin final 80 për qind do ta ketë oferta më e ulët dhe 20 për qind kontratat e ngjashme.