Pronari i argjendarisë nga Tetova kapet në Bogorodicë me bizhuteri ari prej 4 milionë denarësh të fshehura në jastëk qafe

Doganierët në pikën kufitare Bogorodicë kanë zbuluar dhe sekuestruar bizhuteri ari me vlerë 4 milionë denarë te një udhëtar nga Tetova, pronar i një argjendarie, i cili kishte tentuar t’i kontrabandonte të fshehura në një jastëk qafe, teksa po kthehej me autobus nga Stambolli, siç njofton Biznis Vesti duke iu referuar Drejtorisë së Doganave.

Sipas Drejtorisë së Doganave, vepra u zbulua gjatë kontrollit të një autobusi që qarkullonte në linjën Stamboll – Gostivar. Në pyetjen nëse kishin diçka për të deklaruar, asnjëri nga udhëtarët nuk deklaroi mall për kontroll doganor, pas çka u krye një kontroll i detajuar.

Gjatë kontrollit, brenda jastëkut të qafës që mbante i dyshuari u gjetën 77 copë bizhuteri ari me peshë të përgjithshme 612 gramë, siç bën të ditur Drejtoria e Doganave.

Nga hetimi paraprak i Departamentit të Hetimeve janë siguruar prova se tetovari kishte ndërmend që bizhuteritë, të blera në një punëtori argjendarie në Stamboll, t’i fuste ilegalisht në vend dhe t’i shiste në argjendarinë e tij, raporton Biznis Vesti.

Ndaj autorit është ngritur kallëzim penal për veprën penale të kontrabandës. Drejtoria e Doganave thekson se vazhdon me aktivitetet për mbrojtjen e interesave financiare të shtetit dhe për sigurimin e kushteve për një ekonomi të ndershme.