Protesta të dhunshme në Australi, turmat kërkojnë të marrin vrasësin e 5-vjeçares

Përplasje të dhunshme janë regjistruar mbrëmjen e së enjtes jashtë një spitali në Alice Springs, ku një turmë e zemëruar kërkonte dorëzimin e një burri të

Përplasje të dhunshme janë regjistruar mbrëmjen e së enjtes jashtë një spitali në Alice Springs, ku një turmë e zemëruar kërkonte dorëzimin e një burri të akuzuar për vrasjen e një fëmije.

Pamjet dramatike tregojnë protestues që hedhin gurë dhe shkopinj ndaj policisë, ndërsa shkatërrojnë automjete dhe i vënë flakën një furgoni policie. Forcat e rendit përdorën gaz lotsjellës për të shpërndarë turmën, ndërsa disa nga bombolat e tymit u kthyen mbrapsht drejt tyre.

Komisioneri i Policisë së Territorit Verior, Martin Dole, e përshkroi situatën si “anarki absolute”.

Ngjarja lidhet me arrestimin e 47-vjeçarit Jefferson Lewis, i dyshuar për vrasjen e një vajze 5-vjeçare, e njohur si Kumanjayi Little Baby – një pseudonim i përdorur nga komuniteti indigjen për arsye kulturore gjatë periudhës së zisë.

Trupi i vajzës u gjet pas katër ditësh kërkimesh intensive pranë një lumi, rreth 5 kilometra larg vendit ku ishte parë për herë të fundit. Lewis u kap jo nga policia, por nga një turmë e zemëruar, e cila e rrahu rëndë përpara se të ndërhynin autoritetet.

“Në momentin që e morëm në kontroll, ai ishte pa ndjenja dhe po trajtohej nga ambulanca, e cila gjithashtu u sulmua,” deklaroi Dole.

I dyshuari u dërgua në spitalin e Alice Springs, ku qindra persona u mblodhën duke kërkuar që ai t’u dorëzohej për “drejtësi”.

Përfaqësues të komunitetit indigjen bënë thirrje për qetësi. Plaku i Warlpiri, Robin Granites, theksoi se dhuna nuk përfaqëson vlerat e tyre, ndërsa aktivisti Michael Liddle paralajmëroi se retorika e “hakmarrjes” vetëm sa përshkallëzon situatën.

Policia ka paralajmëruar se do të ndjekë penalisht të gjithë personat e përfshirë në dhunë.

Kryeministri australian Anthony Albanese shprehu ngushëllimet për familjen e vajzës, duke theksuar se “asnjë fjalë nuk mund të përshkruajë dhimbjen e tyre”.

Rasti ka rikthyer në vëmendje tensionet e vazhdueshme mes policisë dhe komuniteteve indigjene në Territorin Verior, si dhe shqetësimet për sigurinë e grave dhe fëmijëve indigjenë, të cilët përballen me nivele disproporcionale dhune.