PS rrëzon kërkesën e SPAK për Ballukun

Partia Socialiste vendosi më në fund të dalë me një qëndrim për çështjen e Belinda Ballukut.

Ashtu siç pritej, socialistët do të rrëzojnë kërkesën e SPAK për arrestimin e Ballukut.

Votimi do bëhet në seancë plenare, por vendimi u bë i qartë sot kur Ulsi Manja lexoi raportin e mazhorancës në Këshillin e Mandateve.

“Ne si mazhorancë, arrijmë në përfundimin se nuk ka vend për dhënien e autorizimit për zëvendësimin e masës së sigurimit personal, atë të ndalimit të daljes jashtë shtetit me masën më të rëndë, atë të arrestit me burg, apo në shtëpi, të parashikuar nga neni 237 e 238 të Kodit Penal të Kushtetutës”, tha Manja.

“Rekomandimi nuk e pengon SPAK të vijojë hetimet, ka një masë sigurimi personal, pengimi nga dalja jashtë vendit, që lejon vijimin e procedimit penal. Dhe ne, këtë e konsiderojmë një çështje që tashmë i takon drejtësisë, por masat e sigurimit personal nuk lidhen me ekzistencën ose jo të veprës penale. Të presim përfundimin e hetimeve. Jo më kot e lashë në fund, dua të sjell në vëmendjen e grupit që nga raportet vjetore të institucioneve të drejtësisë, të SPAK, evidentohet qartë se për veprën penale të shkeljes së barazisë në tendera, ka praktikë të konsoliduar për hetim pa masë sigurimi personal. Ka të bëjë me standardet e hetimit për këtë vepër penale”.

Në këtë mënyrë, Edi Rama i vë një kryq të madh integrimit evropian të vendit.

Brukseli ka deklaruar se do e monitorojë me kujdes këtë situatë dhe do dalë me një qëndrim.