Punimet në aksin Tiranë-Durrës te mbikalimi i Kasharit më 6 dhe 7 gusht, ARRSH njofton oraret dhe devijimin e trafikut

Autoriteti Rrugor Shqiptar, ARRSH, ka njoftuar se më datë 6 dhe 7 gusht 2026, nga ora 00:00 deri në 04:30 të mëngjesit, do të kufizohet qarkullimi në dy korsitë e aksit kryesor në drejtimin Tiranë-Durrës, te mbikalimi i ri i Kasharit.

Sipas njoftimit, ky kufizim do të bëhet për shkak të montimit të trarëve metalikë në kuadër të punimeve për zgjerimin e superstradës Tiranë-Durrës dhe garantimit të sigurisë rrugore gjatë këtij procesi.

Ndërkohë, bëhet e ditur se, gjatë këtij intervali orar, i gjithë trafiku që udhëton nga Durrësi do të devijohet në rampat e autostradës Thumanë-Kashar. Mjetet që kanë destinacion Aeroportin “Nënë Tereza” apo Kosovën do të vijojnë lëvizjen në autostradën Kashar-Thumanë, ndërsa automjetet me drejtim Tiranën do të orientohen në rrugën dytësore dhe do të rihyjnë në autostradën kryesore menjëherë pas mbikalimit të Kasharit.

Njoftimi i plotë:

Në vijim të realizimit të punimeve për ndërtimin e objektit:“Zgjerimi i Superstradës Tiranë-Durrës (Faza III)”, është i nevojshëm zbatimi i Planit të Menaxhimit të Trafikut.

Më datë 6 dhe 7 gusht 2026, nga ora 00:00 deri në 04:30, do të kryhet montimi i trarëve metalik të mbikalimit të ri të Kasharit, për zbatimin e këtyre punimeve, si dhe për sigurinë rrugore është i nevojshëm bllokimi i dy korsive të aksit kryesor në drejtimin Durrës-Tiranë.

Gjatë këtij intervali, trafiku që lëviz nga Durrësi në drejtim të Tiranës, Aeroportit “Nënë Tereza” dhe Kosovës do të devijohet në rampat e autostradës Thumanë-Kashar.

Mjetet me destinacion Aeroportin dhe Kosovën do të vijojnë lëvizjen në autostradën Kashar-Thumanë, ndërsa automjetet me destinacion Tiranën do të orientohen me sinjalistikën e përkohshme në rrugën dytësore duke u rikthyer në autostradën Durrës–Tiranë pas mbikalimit të Kasharit.

Kërkojmë mirëkuptimin e drejtuesve të mjeteve, bizneseve dhe banorëve të zonës për këtë ndërhyrje.