Qeveria britanike konfirmon hyrjen e lirë në 15 muzetë kombëtare — braktisen planet për bileta për të huajt

Qeveria britanike ka konfirmuar se hyrja në 15 muzetë kombëtare të vendit do të mbetet falas për të gjithë — duke braktisur planet për të vendosur bileta për vizitorët ndërkombëtarë. Njoftimi u bë nga Lisa Nandy, Sekretare e Shtetit për Kulturën, Median dhe Sportin (DCMS), në një event të organizuar nga Art Fund dhe Cultural Policy Unit në Tate Liverpool, më 28 shtator 2026, siç njofton FAD Magazine.

Vendimi vjen në prag të 25-vjetorit të politikës së hyrjes së lirë universale në koleksionet permanente të muzeve kombëtare, e cila u fut më 1 dhjetor 2001. Më herët gjatë këtij viti, qeveria kishte deklaruar se do të eksploronte mundësinë e tarifimit të vizitorëve ndërkombëtarë, në një kohë kur muzetë po përballen me presione financiare në rritje.

Drejtuesit e muzeve dhe organizatat e sektorit paralajmëruan megjithatë se një hap i tillë mund të godiste numrin e vizitorëve, aksesin dhe ekonominë e vizitorëve. 15 muzetë e sponsorizuara nga DCMS që ofrojnë hyrje falas në koleksionet permanente përfshijnë British Museum, National Gallery, National Portrait Gallery, Natural History Museum, Tate, V&A, Wallace Collection, Imperial War Museums, Royal Museums Greenwich, Science Museum Group, Sir John Soane’s Museum dhe National Museums Liverpool.

Sipas shifrave qeveritare, në vitin financiar 2024/25 muzetë dhe galeritë e sponsorizuara regjistruan 42 milionë vizita, ndërsa të ardhurat e gjeneruara vetë arritën në 563 milionë stërlina — dëshmi, sipas përkrahësve të politikës, se hyrja e lirë nuk e pengon qëndrueshmërinë financiare të institucioneve.

Mbështetje për vendimin erdhi nga drejtoresha e Cultural Policy Unit, Alison Cole, si dhe nga drejtorët e muzeve kombëtare, përfshirë Tristram Hunt, Nicholas Cullinan dhe Gabriele Finaldi të National Gallery-së, i cili e quajti hyrjen e lirë një aset të madh kulturor.