Qeveria ndan edhe 1 milion euro për Fondin e Efiçiencës së Energjisë

Qeveria e Kosovës ka ndarë edhe 1 milion euro për Fondin e Kosovës për Efiçiencë të Energjisë, siç njofton RTK, në një tjetër hap për forcimin e masave që synojnë kursimin dhe përdorimin më të mençur të energjisë në vend.

Sipas njoftimit të Ministrisë së Ekonomisë, ministrja e Ekonomisë, Artane Rizvanolli, dhe drejtoresha menaxhuese e Fondit të Kosovës për Efiçiencë të Energjisë, Njomza Hoxha, kanë nënshkruar marrëveshjen për transferimin e mjeteve në vlerë prej 1 milion eurosh, në mbështetje të veprimtarisë së Fondit dhe të avancimit të objektivave të tij në fushën e efiçiencës së energjisë.

Përmes kësaj marrëveshjeje, Qeveria riafirmon përkushtimin e saj për uljen e konsumit të energjisë, për nxitjen e përdorimit sa më efiçient të saj dhe për përmirësimin e kushteve të jetesës së qytetarëve, përmes investimeve me përfitime të prekshme dhe afatgjata.

Mbështetja për Fondin ka qenë e vazhdueshme ndër vite. Që nga viti 2019, Qeveria ka ndarë gjithsej 10 milionë euro për mbështetjen e fushës së veprimtarisë së tij dhe për zgjerimin e masave të efiçiencës së energjisë në mbarë vendin.

Kjo mbështetje është realizuar edhe përmes bashkëpunimit të ngushtë me partnerët ndërkombëtarë, me qëllim sigurimin e financimit shtesë dhe zgjerimin e programeve në mbështetje të familjeve, ndërtesave shumëbanesore dhe institucioneve publike.