Rakçeviq pagoi plotësisht hotelin “Plaža” në Herceg Novi: 20,4 milionë euro, rreth 12 milionë shkojnë për kreditorët

Kompania “Vile Oliva” e biznesmenit Zharko Rakçeviq ka paguar sot të gjithë shumën për blerjen e hotelit “Plaža” në Herceg Novi, gjithsej 20,4 milionë euro, siç njofton Radio Televizija Herceg Novi. Pas depozitës prej rreth 3 milionë eurosh, kompania derdhi në llogarinë e përmbarueses publike Jasminka Bajoviq edhe pjesën e mbetur prej 17,3 milionë eurosh, një ditë para skadimit të afatit.

Sipas raportimit të RTHN-së, pagesa e plotë i hap rrugë regjistrimit të blerësit si pronar në kadastër, por edhe shlyerjes së plotë të detyrimeve ndaj kreditorëve, mes të cilëve janë edhe ish-punonjësit e kompanisë “Vektra Boka”, pronare e mëparshme e hotelit.

Nga shuma e paguar, rreth 12 milionë euro do të ndahen mes kreditorëve: familja Shaboviq do të marrë 2,26 milionë euro, banka CKB 4,7 milionë, ndërmarrja e ujësjellësit 600 mijë, Komuna e Herceg Novit 800 mijë, Administrata Tatimore 300 mijë euro, ndërsa punonjësve nga plani i riorganizimit u detyrohen edhe rreth 80 mijë euro. Pjesa e mbetur, rreth 8 milionë euro, do të kalojë në llogarinë e debitorit përmbarimor.

Hoteli “Plaža” u shit më 14 shtator në ankandin e parë publik për 20,4 milionë euro, pasi më parë ishte vlerësuar 30,7 milionë euro, ndërsa çmimi fillestar në ankand ishte 24 milionë euro, siç njofton RTHN-ja.

Nga kompania “Vile Oliva” kanë paralajmëruar se hotelit do t’i kthejnë shkëlqimin e dikurshëm, duke e rinovuar në kategorinë me katër yje dhe duke investuar në përshtatjen e tij deri në 20 milionë euro shtesë, nga çka, sipas tyre, do të përfitojë i gjithë Herceg Novi.