Shpallet thirrja për dy gjyqtarë të rinj të Gjykatës Kushtetuese, aplikimet hapen deri më 2 nëntor

Komisioni i Posaçëm për Shqyrtimin e Kandidatëve për Emërim në Gjykatën Kushtetuese ka vendosur në mbledhjen e tij të parë shpalljen e thirrjes publike për zgjedhjen e dy gjyqtarëve të rinj të Gjykatës Kushtetuese të Republikës së Kosovës, siç njofton Indeksonline.

Kryetari i këtij komisioni, Vigan Qorrolli, bëri të ditur se thirrja publike do të hapet nga dita e nesërme dhe do të mbetet e hapur për 20 ditë, deri më 2 nëntor 2026, duke plotësuar dy vendet që kanë mbetur vakante nga legjislatura e kaluar.

Sipas Qorrollit, në përputhje me Ligjin për Gjykatën Kushtetuese, kandidaturat mund të propozohen nga institucionet e drejtësisë, por edhe individët që i plotësojnë kushtet e parapara me ligj mund të vetëpropozohen.

Pas përfundimit të afatit për aplikim, komisioni do të shqyrtojë kandidaturat e pranuara dhe do të zhvillojë intervistat me kandidatët, raporton edhe Reporteri.

Plotësimi i përbërjes së Gjykatës Kushtetuese konsiderohet hap i rëndësishëm për funksionimin e plotë të institucionit më të lartë kushtetues të vendit, i cili ka funksionuar me përbërje të paplotë.