Rama dhe Mickoski nesër hapin pikën e përbashkët kufitare në Qafë Thanë
Kryeministrat e Maqedonisë së Veriut dhe të Shqipërisë promovojnë të dielën sistemin e integruar të kontrollit kufitar "One Stop Shop", me një kontroll të vetëm e të përbashkët në vend të kontrolleve të ndara.
Kryeministrat Hristijan Mickoski dhe Edi Rama do të marrin pjesë nesër, të dielën, më 22 nëntor 2026, në promovimin e sistemit të integruar të kontrollit kufitar “One Stop Shop” në pikën kufitare Qafë Thanë, siç njofton INA. Ceremonia zyrtare fillon në orën 10:00, ndërsa pas promovimit të dy kryeministrat pritet të mbajnë një deklaratë të përbashkët për mediat.
Sistemi “One Stop Shop”, ose “një ndalesë e vetme”, synon modernizimin e procedurave doganore dhe policore, duke zëvendësuar kontrollet e ndara e të përsëritura në të dyja anët e kufirit me një kontroll të koordinuar e të unifikuar. Në vend që udhëtarët dhe transportuesit të ndalen dy herë, procedurat do të kryhen në një pikë të vetme, me bashkëpunim të ngushtë mes autoriteteve të të dy vendeve.
Qëllimi kryesor i këtij modeli është ulja e ndjeshme e kohës së pritjes dhe lehtësimi i qarkullimit të lirë të udhëtarëve dhe mallrave midis Maqedonisë së Veriut dhe Shqipërisë. Pritet që kalimi më i shpejtë dhe më i thjeshtë të sjellë përfitime të drejtpërdrejta për qytetarët, bizneset dhe transportin ndërkufitar.
Qafë Thana është një nga nyjet kryesore të transportit dhe shkëmbimit tregtar në rajon, pjesë strategjike e lidhjes lindje-perëndim, Korridorit VIII, dhe e rrugës kryesore drejt bregdetit shqiptar. Vënia në funksion e kontrollit të përbashkët aty pritet ta forcojë më tej lidhjen mes dy vendeve dhe të lehtësojë lëvizjen në këtë aks të rëndësishëm rajonal.



Komentet
Bëhu i pari që komenton!
Lini një Koment të Ri
Për t'u përgjigjur një komenti specifik, kliko butonin 💬 Përgjigju poshtë atij komenti.