Rama në New York, takim me sipërmarrës shqiptarë për sfidat në rrugën e ndërtimit të Shqipërisë

Kryeministri Edi Rama ka zhvilluar një takim në New York me sipërmarrës dhe profesionistë të suksesshëm të komunitetit shqiptar në Amerikë.

Nëpërmjet një postimi në Facebook, kryeministri shkruan se në takim u diskutua, “për sfidat në rrugën e ndërtimit të Shqipërisë që duam dhe për të çuar përpara idetë dhe projektet konkrete të bashkëpunimit që zunë fill në Samitin e parë të Diasporës mbajtur një vit më parë në Tiranë”.

Në data 18 – 20 nëntor 2016 u zhvillua në Tiranë Samiti i Diasporës shqiptare.
Kjo veprimtari, e para e llojit të saj në Shqipëri, mblodhi në kryeqytetin shqiptar përfaqësues të diasporës shqiptare nga mbi 40 shtete të botës. Komuniteti shqiptar i Shteteve të Bashkuara të Amerikës u përfaqësua në këtë veprimtari nga mbi 100 shqiptaro-amerikanë, të cilët morën pjesë aktive në panelet e ndryshme të organizuara gjatë samitit dhe ndanë me të pranishmit përvojat e tyre, duke i shtuar vlerat kësaj veprimtarie.

Kryeministri Edi Rama po zhvillon një vizitë disaditore në SHBA.