Rama paralajmëron: Kosova rrezikon t’i humbasë Lojërat Mesdhetare 2030

Kryetari i Prishtinës, Përparim Rama, ka ngritur të enjten alarmin se Kosova rrezikon ta humbasë organizimin e Lojërave Mesdhetare 2030, pasi, siç njofton KosovaPress, Komiteti Ndërkombëtar i Lojërave Mesdhetare (ICMG) ka konfirmuar mungesën e përgjigjeve institucionale nga pala kosovare.

Në letrën e ICMG-së, të cilën Rama e bëri publike dhe e cila u është dërguar edhe kryeministrit Albin Kurti dhe kryetarit të Komitetit Olimpik të Kosovës, Ismet Krasniqi, thuhet se komiteti nuk ka marrë përgjigje në letrën e nisur më 21 shtator. Sipas letrës, garancia bankare dhe e sigurimit, e cila duhej të dorëzohej që nga janari i vitit 2026, mbetet ende e papërmbushur, ndërsa nuk është paguar as tarifa për muajin qershor.

ICMG-ja vlerëson se këto probleme e rrezikojnë seriozisht përgatitjen dhe organizimin e Lojërave, prandaj Komiteti Ekzekutiv i tij do ta shqyrtojë çështjen në mënyrë të detajuar në mbledhjen e 19 dhjetorit, ku mund të ratifikohet edhe propozimi për thirrjen e një Asambleje të Jashtëzakonshme të Përgjithshme, e cila do të vendosë për të ardhmen e edicionit 2030.

Rama ka theksuar se Prishtina i ka fituar të drejtat për organizimin e Lojërave dhe se Komuna ka punuar në hartimin e masterplanit, përcaktimin e projekteve dhe lokacioneve, të miratuara edhe në Asamblenë e Kryeqytetit. Sipas tij, tani përgjegjësia i takon Qeverisë qendrore dhe Komitetit Organizativ, në krye të të cilit, siç shkruan ai, kryeministri Kurti e ka vendosur vetveten.

Kosova ende nuk e ka të gatshme infrastrukturën për këtë ngjarje, ndërkohë që po bëhen rinovime në disa stadiume dhe palestra sportive. Lojërat Mesdhetare 2030 janë ndër ngjarjet më të mëdha sportive që vendi pritet të organizojë, dhe humbja e mundshme e organizimit do të përbënte një goditje të rëndë për sportin kosovar.