Rama pritet nga Rutte në selinë e NATO-s: Shqipëria vlerësohet në sektorin e mbrojtjes

Kryeministri Edi Rama, zhvilloi një vizitë zyrtare në selinë e Aleancës Atlantike në Bruksel, ku u prit në takim nga Sekretari i Përgjithshëm i NATO-s, Mark Rutte.

Përmes një njoftimi të shpërndarë në rrjetet sociale, kreu i qeverisë shqiptare e cilësoi takimin si veçanërisht të rëndësishëm, duke vlerësuar qëndrimin e Ruttes për zhvillimet e dinamikat e sigurisë në rajonin e Ballkanit Perëndimor.

Gjatë bashkëbisedimit, Sekretari i Përgjithshëm i NATO-s shprehu vlerësime për ecurinë dhe transformimin e sektorit të mbrojtjes në Shqipëri, si dhe për përkushtimin e institucionalizuar të vendit në përmbushjen e të gjitha detyrimeve dhe standardeve të aleancës ushtarake.

Fokusi i bisedimeve u ndal në rolin e Shqipërisë si një faktor stabilizues në rajon, investimet e vazhdueshme në modernizimin e forcave të armatosura dhe bashkëpunimin e ngushtë dypalësh për përballimin e sfidave të sigurisë kolektive.

“Gjithnjë të veçanta takimet me Sekretarin e Përgjithshëm, Mark Rutte, një njohës i spikatur i Europës, vëzhgues i vëmendshëm i Ballkanit Perëndimor dhe dashamirës i hapur i Shqipërisë. Kënaqësi për fjalët vlerësuese dhe inkurajuese për ecurinë e sektorit të mbrojtjes në Shqipëri, si edhe seriozitetin e Shqipërisë në përmbushjen e detyrimeve të NATO-s”, shkruan Rama në rrjetet sociale.

Ende nuk ka komente. Bëhuni i pari që komenton.