Rasti i parë në Holandë, 2-vjeçarja i nënshtrohet eutanazisë

Një foshnjë dyvjeçare është eutanizuar në Holandë, rasti i parë i vdekjes së asistuar tek një fëmijë nën moshën 12 vjeç.

Fëmija u eutanizua në fund të vitit 2025, siç u zbulua nga Ministrja e Shëndetësisë Sophie Hermans në parlamentin holandez në qershor.

Eutanazia e foshnjave është praktikuar në Holandë për shumë vite. Përpara ndryshimit të fundit në ligj, vetëm të porsalindurit dhe fëmijët mbi moshën dymbëdhjetë vjeç mund të eutanazizoheshin. Megjithatë, kjo ishte hera e parë që një fëmijë nën moshën 12 vjeç, i cili nuk ishte foshnjë, vdiste përmes eutanazisë në vend.

Fëmija lindi para kohe, vetëm në javën e 26-të të shtatzënisë, dhe u përball me probleme serioze shëndetësore , të tilla si paralizë cerebrale, dëmtime të shikimit dhe kriza. Ai nuk iu përgjigj trajtimit, ishte i shqetësuar dhe i paaftë të flinte për periudha të gjata, ndërsa akumulimi i mukusit në mushkëri ia vështirësoi ndjeshëm frymëmarrjen.

Për shkak të natyrës së pakthyeshme të gjendjes dhe efekteve kumulative të këtyre gjendjeve, mjekët kishin arritur në përfundimin se fëmija nuk do të jetonte deri në moshën madhore. Ata gjithashtu përcaktuan se ishte e pamundur të lehtësohej dhimbja e tij përmes trajtimit mjekësor. Ishte atëherë që prindërit dhe mjeku që kujdesej vendosën t’i jepnin fund jetës së fëmijës.

Holanda ndryshoi ligjin e saj për eutanazinë në vitin 2024 për të lejuar eutanazinë për fëmijët e moshës 1 deri në 12 vjeç në kushte shumë të rrepta – duke përfshirë që fëmija duhet të përjetojë vuajtje të pashpresa dhe të padurueshme, që të mos ketë alternativë tjetër të arsyeshme dhe që rasti duhet të vlerësohet nga të paktën një mjek tjetër i pavarur.