Reagon Thaçi: I quan spekulime paralajmërimet e mbrëmshme të ambasadorëve
Presidenti i vendit, Hashim Thaçi i ka quajtur spekulime paralajmërimet e ambasadorëve, të cilët kanë thënë se lëvizja për shfuqizimin e Gjykatës Speciale është tejet e rrezikshme për të ardhmen e Kosovës dhe mund ta lë atë të izoluar.
Thaçi, në një postim në rrjetin social Twitter, ka thënë se shoqëria dhe udhëheqja e Kosovës mbeten plotësisht të angazhuara për demokraci e sundim të ligjit.
“Midis spekulimeve është e rëndësishme që të gjithë të vazhdojnë të jenë të sigurt për të ardhmen e Kosovës dhe proceset e saj demokratike. Shoqëria dhe udhëheqja e Kosovës mbeten plotësisht të angazhuara për demokraci, sundim të ligjit, pajtim, dialog dhe marrëdhënie në baza të barabarta dhe të drejta”, ka shkruar Thaçi, transmeton Express.
Ambasadori amerikan Greg Delawie dhe ai britanik Ruari O’Connel kanë thënë mbrëmë se “nëse shfuqizohet Ligji për Gjykatën Speciale, Kosova do të izolohet”.
Iniciativa e Hashim Thaçit, Kadri Veselit dhe Ramush Haradinajt, drejtues të tri institucioneve kryesore të vendit, për ta proceduar shfuqizimin e Ligjit për Gjykatën Speciale ka dështuar në dy tentativat e djeshme të Kryesisë së Kuvendit në mungesë të kuorumit.
Ambasadorët e Quintit, kanë thënë pa ngurrim që një lëvizje e tillë për shfuqizimin e Speciales është tejet e rrezikshme për të ardhmen e Kosovës, përderisa gjatë ditës së sotme disa deputetë të pozitës kanë thënë se nuk kanë qenë të vetëdijshëm se çka janë duke nënshkruar.
