Rekordi për qeverisjen më afatgjatë në Itali, Meloni i përgjigjet Ramës: Miku im Edi, faleminderit! Shqipëria, mike dhe partnere e çmuar

Kryeministrja italiane Giorgia Meloni i është përgjigjur urimit të kryeministrit Edi Rama për rekordin prej 1413 ditësh në detyrë, duke u bërë kryeministrja me qeverinë më jetëgjatë në historinë e Republikës Italiane.

Meloni e falënderoi Ramën për videomesazhin dhe duke iu përgjigjur me të njëjtën dozë humori.

“Edi, miku im, të falënderoj nga zemra për këtë videomesazh. Si gjithmonë, arrin të ndërthurësh ironinë me disa të vërteta të pakëndshme. Më vjen mirë të di që, pas kaq shumë ndryshimesh të bashkëbiseduesve në Romë, më në fund ke pasur mundësinë të afeksionohesh pak më shumë me atë aktualin. Ndryshimi i shpeshtë i ‘stolit’ nuk ndihmon kurrë për të ndërtuar diçka solide. Por në fund, kur gjen ekipin e duhur, është më e lehtë të luash mirë dhe të arrish rezultat”, shkruan ajo.

Meloni vlerëson gjithashtu marrëdhënien me kryeministrin shqiptar dhe bashkëpunimin mes dy vendeve.

“Gjatë këtyre viteve kemi ndarë një marrëdhënie të sinqertë dhe një bashkëpunim konkret, që ka forcuar gjithnjë e më shumë lidhjen mes dy vendeve tona”, shkruan Meloni.

Ajo e cilëson Shqipërinë “një mike dhe një partnere të çmuar”, duke shprehur krenarinë për rrugëtimin e përbashkët edhe në kuadër të integrimit evropian.

“Një përqafim i përzemërt, dhe shihemi së shpejti!”, përfundon Meloni.