Nuk deklaroi pasurinë dhe nuk pagoi gjobën, dërgohet për gjykim ish-kryetari i Këshillit të Qarkut Vlor
Prokuroria e Rrethit Gjyqësor Vlorë dërgoi për gjykim kërkesën ndaj shtetasit Anesti Dhimojani, ish-Kryetar i Këshillit të Qarkut të Vlorës, akuzuar për veprën penale të “refuzimit për deklarim të interesave private (deklaratës së pasurisë), parashikuar nga neni 257/a, paragrafi i parë i Kodit Penal.
Hetimi ndaj këtij shtetasi ka nisur pas kallëzimit të dorëzuar në 29 gusht 2014 nga ana e Inspektoratit të Lartë të Deklarimit dhe Kontrollit të Pasurive dhe Konfliktit të Interesave (ILDKPKI).
Nga hetimi ka rezultuar se shtetasi Dhimojani nuk ka dorëzuar deklaratën e interesave private ‘Pas largimit nga funksioni”, pavarësisht se ai kishte njoftim zyrtar mbi këtë detyrim dhe fillimisht ndaj tij ishte aplikuar edhe masa administrative “gjobë” për vonesë në deklarim.
I pandehuri Anesti Dhimojani ka ushtruar detyrën e Kryetarit të Këshillit të Qarkut Vlorë nga data 01.11.2011 deri në datën 04.06.2014, datë në të cilën është larguar nga kjo detyrë. Bazuar në kërkesat e nenit 3, të ligjit nr.9049, “Për deklarimin dhe kontrollin e pasurive, të detyrimeve financiare të të zgjedhurve dhe të disa nëpunësve publikë”, të ndryshuar, për shkak të këtij funksioni i pandehuri Anesti Dhimojani ka pasur detyrimin që të dorëzonte deklarimin e interesave private pranë Inspektoriatit të Lartë të Deklarimit dhe Kontrollit të Pasurive dhe Konfliktit të Interesave, (I.L.D.K.P.K.I) Tiranë. Nga hetimet e kryera ka rezultuar se i pandehuri Anesti Dhimojani nuk ka përmbushur detyrimin ligjor për deklarimin e interesave private “Periodike Vjetore”, për vitet 2011, 2012 dhe 2013. Po kështu, nuk rezulton që i pandehuri Anesti Dhimojani të ketë përmbushur detyrimin ligjor për të dorëzuar deklaratën e interesave private pas largimit nga funksioni, brenda afatit 15 ditor, siç është parashikuar edhe nga nenet përkatëse të ligjit “Për deklarimin dhe kontrollin e pasurive, të detyrimeve financiare të të zgjedhurve dhe të disa nëpunësve publikë”.
Lidhur me këto mosveprime I.L.D.K.P.K.I Tiranë, ka vendosur që të marrë masë administrative ndaj të pandehurit Anesti Dhimojani, duke e dënuar atë me gjobë në masën 100.000 lekë. Vendimi i mësipërm i është njoftuar të pandehurit me anë të shërbimit postar dhe i pandehuri ka marrë dijeni për vendosjen e masës administrative.
Në këto rrethana, i pandehuri Anesti Dhimojani akuzohet se ka konsumuar elementët e figurës së veprës penale “Refuzimi për deklarimin, mosdeklarimi, fshehja ose deklarimi i rremë i pasurive të personave të zgjedhur dhe nëpunësve publikë”.
Burime nga prokuroria sqarojnë se i pyetur lidhur me akuzën i pandehuri ka shpjeguar se ka dijeni për masën administrative të marrë nga I.L.D.K.P.K.I Tiranë ndaj tij, ka shpjeguar gjithashtu se deklaratat e interesave private periodike vjetore dhe atë pas largimit nga funksioni nuk i ka dorëzuar për shkak të neglizhencës së tij, por jo me ndonjë qëllim për të fshehur ndonjë pasuri. Këto shpjegime nuk përbëjnë shkak për përjashtimin e të pandehurit nga përgjegjësia penale.
