Restaurohet kisha e Shën Marisë në Cerckë, monument kulture i shekullit XI

Kisha e Shën Marisë në fshatin Cerckë të Kolonjës, monument kulture i shpallur i tillë që prej vitit 1970, i është nënshtruar punimeve restauruese për të parandaluar degradimin e mëtejshëm të saj.

Ndërhyrjet në kishën e shekullit të 11-të, përfshijnë restaurimin e çatisë, murit rrethues dhe pastrimin e vegjetacionit, pasi objekti ishte përfshirë në listën e monumenteve në rrezik për shkak të dëmtimeve të mëdha në çati.

Kisha e Shën Marisë shquhet për arkitekturën mesjetare dhe afresket e pasura murale me skena biblike, shenjtorë dhe motive dekorative, që përbëjnë një dëshmi të rëndësishme të trashëgimisë kulturore dhe artistike shqiptare.

Kisha e “Shën Mërisë” gjendet në fshatin Cerckë të Kolonjës. Ajo përbëhet nga naosi, narteksi dhe mjedisi i altarit. Kisha është një paraklis me përmasa 6,55 x 5,26 metra. Naosi i kishës mbulohet me çati dyujëse. Muratura është me gurë të papërpunuar të lidhur me llaç gëlqereje. Muret e kishës janë të zbukuruara me tulla dhe gurë të vendosur në formë kurrizpeshku, pjerrtas dhe vertikalisht. Muret e brendshme të kishës janë të stolisura me piktura murale prej një piktori anonim. Kisha mendohet të jetë ndërtuar në shek. XI.