RIK diskuton nëse Vuçiçi është në konflikt interesi si bartës i listës ‘Serbia e Bashkuar’

Komisioni Republikan Zgjedhor (RIK) po diskuton katër ankesa të qytetarëve nëse ka konflikt interesi te lista zgjedhore “Aleksandar Vuçiç – Serbia e Bashkuar”, bartëse e së cilës është presidenti në detyrë i Serbisë, Aleksandar Vuçiç.

Anëtarja e RIK-ut, Sofija Mandiq, tha se RIK-u ishte i detyruar të kërkonte mendimin e Agjencisë për Parandalimin e Korrupsionit, pasi vetë agjencia nuk veproi zyrtarisht kur presidenti njoftoi se do t’i jepte emrin listës.

“Ka organe kompetente që vlerësojnë nëse situatat ku ndodhet një funksionar publik… janë në kundërshtim me idenë e sundimit të ligjit, ndarjes së pushteteve, zgjedhjeve të lira e të ndershme dhe parimeve të ngjashme kushtetuese”, tha Mandiq në mbledhjen e komisionit.

Ajo shtoi se vetë presidenti Vuçiç e pranoi se ishte në konflikt interesi në momentin kur njoftoi se do të jepte dorëheqjen dhe se në fushatë do të hynte si qytetar i zakonshëm. Nga ana tjetër, kryetari i RIK-ut, Vladimir Dimitrijeviç, pretendon se në asnjë vend të BE-së nuk ka ndalim kandidature, përveç Kroacisë, dhe u bëri thirrje anëtarëve të RIK-ut të respektojnë neutralitetin politik dhe paanshmërinë.

Debati zhvillohet në prag të zgjedhjeve të parakohshme parlamentare të 25 tetorit, ku lista “Serbia e Bashkuar” e mban emrin e presidentit në detyrë si bartës të saj, ndërsa RIK-u pritet të vendosë nëse kjo paraqet konflikt interesi.

Burimi: Nova.rs