Roberto Mancini mund të festojë tani, fiton zyrtarisht titullin kampion në Katar

Ish-trajneri i Italisë e kishte fituar matematikisht titullin pak javë më parë, por Al-Shamal i vendit të dytë rikuperoi 3 pikë në tavolinë për shkak të një gabimi në zëvendësimet e kundërshtarit.

Thuhet se pritja e shton dëshirën dhe tani me siguri Roberto Mancini e ka shijuar më shumë titullin e fituar me Al-Sadd në Katar. Titulli u sigurua matematikisht falë 3 pikëve kundër Shamal, që nëse fitonte, mund ta kalonte në renditje Al-Sadd në kthesën e fundit.

Ndeshja mes dy vendeve të para përfundoi 3-2 në favor të skuadrës së Mancinit. Fitimi i titullit bëhet zyrtar për Al-Sadd, pas episodit kontrovers të javëve të fundit, ku Shamal mori 3 pikët e një ndeshjeje të humbur. Shkak u bë një zëvendësim i gabuar i kundërshtarit, Qatar SC, që kishte fituar 0-2, por duke aktivizuar një lojtar të huaj më shumë se sa lejon rregullorja.

Ajo fitore 3-0 në tavolinë rihapi “kartat” e titullit, por fitorja në sfidën direkt e kurorëzoi Al-Sadd kampion. Tani Mancini dhe të tijtë janë të lirë të festojnë.

“Falënderoj lojtarët për këtë arritje. Të gjithë ruajtën përqendrimin dhe dhanë maksimumin gjatë gjithë sezonit. Falënderoj edhe stafin teknik dhe atë administrativ. Është një moment gëzimi për të gjithë dhe duam ta ndajmë me tifozët. Ky titull, pas Superkupës, na dhuron një tjetër moment special”, – tha trajneri italian.