Rregullatorët bërthamorë: Rreziku i një aksidenti bërthamor në Ukrainë po rritet këtë dimër
Rregullatorët e sigurisë bërthamore që përfaqësojnë 38 vende thanë të hënën se rreziku i një aksidenti bërthamor në Ukrainë po rritet këtë dimër dhe i kërkuan Rusisë të ndalë sulmet ndaj infrastrukturës energjetike të vendit, raporton Reuters.
Në deklaratën e përbashkët, të parë nga Reuters përpara publikimit, ata shprehin shqetësim të thellë për rreziqet në rritje ndaj sigurisë bërthamore nga lufta e Rusisë dhe sulmet e vazhdueshme ndaj infrastrukturës energjetike, dhe shohin nevojë urgjente që Rusia të ndalë sulmet ndaj objekteve bërthamore dhe infrastrukturës energjetike thelbësore për funksionimin e tyre të sigurt.
Shqetësimi kryesor është se, pa furnizim të qëndrueshëm me energji nga rrjeti, centraleve u bëhet gjithnjë e më e vështirë ta mbajnë materialin bërthamor të ftohur dhe të shmangin një shkrirje (meltdown), me çlirime të mundshme radioaktiviteti si në katastrofën e Çernobilit më 1986.
Deklaratën e bëjnë HERCA (drejtuesit e autoriteteve evropiane të mbrojtjes nga rrezatimi), WENRA (shoqata e rregullatorëve bërthamorë të Evropës Perëndimore) dhe NORA (drejtuesit e autoriteteve nordike të sigurisë nga rrezatimi) — 38 vende, përfshirë të gjitha vendet e BE-së, SHBA-në, Britaninë, Kanadanë dhe Japoninë.
Per Strand, drejtues i HERCA-s dhe NORA-s, tha në intervistë se sulmet ruse janë bërë më vdekjeprurëse javët e fundit, me dronë me ngarkesa më të mëdha dhe shënjestrim më të saktë, se rreziku më i lartë për aksident bërthamor do të jetë këtë dimër, dhe se skenari më i keq është një ndërprerje kombëtare e rrjetit elektrik që do të prekte njëkohësisht nëntë reaktorët prodhues të Ukrainës. Sipas tij, situata mund të ndalet nëse veprohet tani dhe i bëhet presion Rusisë, përndryshe vendet evropiane duhet të përgatiten për pasojat.
Agjencia Ndërkombëtare e Energjisë Atomike (IAEA) tha të shtunën se aktiviteti ushtarak shkaktoi paqëndrueshmëri në rrjetin elektrik javën e kaluar, me ulje prodhimi në disa njësi. Ukraina ka katër centrale bërthamore, tre në funksion, që japin rreth 80% të energjisë së përdorur këtë dimër. Zaporizhzhia, më e madhja në Evropë, është nën kontroll rus, nuk prodhon, varet nga energjia e jashtme për ftohje dhe që nga fillimi i luftës e ka humbur energjinë e jashtme 27 herë, ndërsa që nga fundi i marsit mbështetet në një linjë të vetme të jashtme. Rusia dhe Ukraina akuzojnë njëra-tjetrën për goditjet ndaj centralit.



Komentet
Bëhu i pari që komenton!
Lini një Koment të Ri
Për t'u përgjigjur një komenti specifik, kliko butonin 💬 Përgjigju poshtë atij komenti.