Rumani, gjendet në Detin e Zi një pjesë droni pas alarmeve ajrore

Autoritetet rumune kanë nisur hetimet pasi një fragment i dyshuar droni u gjet në Detin e Zi, pranë plazhit të Costinești-t, pas një serie alarmesh për dronë pranë kufirit me Ukrainën.

Gazetarja e Euronews Romania, Diana Sobaru, tha se alarmet nisën pak pas mesnatës në qarkun Tulcea, kur sistemet e sigurisë zbuluan disa dronë që po i afroheshin hapësirës ajrore rumune. “Banorët morën mesazhe emergjente Ro-Alert dhe disa orë më vonë një fragment i madh, që dyshohet të jetë pjesë e një droni, u zbulua në det, pranë plazhit të Costinești-t.”

Sipas saj, moti i keq mund ta ketë sjellë fragmentin në breg. “Në zonë po zhvillohej një stuhi dhe është e mundur që ajo ta ketë sjellë fragmentin deri aty. Zona u sigurua menjëherë, ndërsa turistët u evakuuan nga plazhi për t’u lejuar autoriteteve të kryenin hetimet.”

Alarmet vijuan edhe në Tulcea, ku sistemet zbuluan sërish dronë pranë kufirit. “Avionë të policimit ajror u ngritën për të monitoruar situatën. Sipas autoriteteve, një dron hyri në hapësirën ajrore rumune për rreth dy minuta.”

Sobaru shtoi se peshkatarët në zonë filmuan avionë ushtarakë që dukeshin se po ndiqnin një objektiv mbi territorin ukrainas, ndërsa pak më vonë u dëgjuan shpërthime.

“Po shohim një numër në rritje incidentesh me dronë që hyjnë në hapësirën ajrore rumune, ndërsa fragmente, e në disa raste edhe dronë të tërë detarë ose ajrorë, po mbërrijnë pranë bregdetit rumun. Situata është veçanërisht e ndjeshme tani, pasi është sezoni veror dhe në resortet bregdetare ndodhen shumë turistë”, përfundoi gazetarja e Euronews Romania.