Rumania akuzon Rusinë: një dron fundos anijen e mallrave pranë Konstancës, një marinar i vrarë dhe tre të zhdukur

Presidenti rumun Nicușor Dan akuzoi të premten Rusinë se po përshkallëzon sulmet në krahun lindor të NATO-s, pasi një goditje me dron fundosi një anije mallrash pranë brigjeve rumune të Detit të Zi, duke vrarë të paktën një marinar, ndërsa tre të tjerë janë ende të zhdukur, siç njofton Reuters.

Sipas autoritetit detar rumun, anija Khoryv, me flamur të Komoreve dhe me një ekuipazh prej 13 marinarësh ukrainas dhe azerë, dërgoi sinjal alarmi 13 milje detare larg portit të Konstancës, pak jashtë ujërave territoriale rumune. Nëntë marinarë u shpëtuan nga uji, tre janë të zhdukur dhe u gjet trupi i një tjetri. Pamjet e publikuara nga autoritetet rumune tregojnë vetëm një pjesë të vogël të bykut të anijes së përmbysur mbi ujë, ndërsa anijet e emergjencës vijojnë kërkimet në det të trazuar dhe erë të fortë.

«Është pjesë e procesit të përshkallëzimit të Rusisë në luftën e saj në Ukrainë», u tha gazetarëve presidenti Dan, duke shtuar se anija u godit nga një dron.

Siç thekson Reuters, dy javët e fundit janë shënuar nga një rritje e papritur e sulmeve vdekjeprurëse ndaj anijeve tregtare pranë brigjeve të Rumanisë dhe Bullgarisë, anëtare të NATO-s: të paktën shtatë anije mallrash janë goditur dhe rreth 30 marinarë raportohen të vrarë ose të zhdukur. Anijet e goditura kanë qenë të ankoruara pranë ose në drejtim të kanalit Sulina, që lidh lumin Danub me Detin e Zi dhe është bërë rruga kryesore e eksportit për Ukrainën. Ukraina, Rumania dhe Bullgaria i kanë kërkuar NATO-s të bëjë më shumë për mbrojtjen e lundrimit tregtar në Detin e Zi; aleanca njoftoi të martën se do të dërgojë atje avionë patrullimi detar, sisteme radarësh dhe dronë.