Samoel Rrasa, i katërti në “Taranto 2026”

Samoel Rrasa në peshën deri në 65 kilogram në peshëngritje nuk ka shkuar më shumë se sa vendi i katërt. I katërt në shkëputje dhe i katërt në shtytje, ndërsa nuk mbërriti në podiumin e medaljeve. Në fakt prova e parë e parealizuar në stilin e shkëputjes me 116 kilogram ka ardhur nga fakti se greku Lampridis pas realizimit të provës me 80 kilogram bëri pas.

Dhe një situatë e tillë e gjeti të papërgatitur Samoel Rrasën në stilin e shkëputjes, ndërsa ishte ende në nxehmje për t’u bërë gati për provën, gjë që u përsërit dhe në shtytje po në provën e parë të parealizuar me 145 kilogram. Dhe 116 kilogram e realizoi në të dytën, ndërsa në të tretën nuk arriti të ngrinte 128 kilogram. Ndërkohë në shtytje nuk realizoi në provën e parë 145 kilogram, të cilën e realizoi në të dytën.

Në të tretën nuk arriti të ngrinte 151 kilogram. Përfundimisht i katërti, ndërsa në stilin e shkëputjes medalja e artë ishte për egjiptianin Zarki me 133 kilogram, e argjendta për turkun Hardal me 132 kilogram dhe e bronzta për italianin Massida me 130 kilogram. Në shtytje e arta për italinin Massida me 162 kilogram, e argjendta për egjiptianin Zaki me 161 kilogram dhe e bronzta për turkun Hardal me 156 kilogram.

Të gjitha medaljet u dorëzuan nga Presidenti i Komisionit Koordinativ të Lojërave Mesdhetare “Taranto 2026”, Stavri Bello. Në peshëngritje për Shqipërinë do të jenë në pedanë Briken Calja në peshën deri në 75 kilogram, Enkilejda Carja në peshën deri në 69 kilogram, Erkand Qerimaj në peshën deri në 85 kilogram dhe Ertjan Kofsha në peshën deri në 95 kilogram.