Plan shpëtimi për industrinë, Gjiknuri i kërkon qeverisë përgjysmim të rentës minerare
Rënia e çmimeve të mineraleve në tregun ndërkombëtar ka vënë në vështirësi industrinë minerare në vend. Për të shmangur një faliment masiv në kompanitë e nxjerrjes dhe tregtimit të mineraleve, ministria e Energjetikës, i ka kërkuar Ministrisë së Financave me anë të një propozimi zyrtar të marrë në konsideratë disa lehtësi fiskale ndaj bizneseve të sektorit.
Ministria e Energjetikës i vë në dukje ministrisë së Financave që sipas përcaktimi i ligjit “Për sektorin minerar”, si dhe ligjit për taksat kombëtare, Renta minerare duhet të llogaritet mbi bazën e çmimit të mineralit të shitur në grykën e galerisë/sheshin e depozitimit të gurores. Me këtë sqarim nevojitet që të hiqet nga baza e tatueshme vlera e transportit të mineralit nga pika e nxjerrjes deri në pikën për shitje, propozon dokumenti i Gjiknurit nisur në ministrinë e Financave.
Po kështu nga llogaritja e rentës duhet të hiqet edhe përqindja e lagështirës qe ka në përmbajte të tij minerali në momentin që peshohet nga dogana për të përcaktuar vlerën e rentës, propozon Gjiknuri.
Meqenëse shumë minerale nuk kuotohen në bursa dhe çmimet e tyre ndryshojnë shume, atëherë për mineralin e nxjerr çmimi sipas ministrisë së Energjetikës duhet të llogaritet në këtë mënyrë:
-Kur minerali shitet direkt, pra nuk përpunohet në produkt tjetër, çmimi i tij të llogaritet mbi bazën e çmimit mesatar në treg. Konkretisht për mineralin e kromit çmimi llogaritet mbi bazën e çmimit të dhënë në bursë.
-Kur minerali përpunohet duke prodhuar një produkt tjetër (koncentrat apo ferrokrome, bakër blister, etj.) atëherë çmimi i mineralit të llogaritet mbi bazën e çmimit të produktit në treg duke i zbritur të gjitha shpenzimet e kryera për transformimin e mineralit në produkt.
Ministria e Energjetikës kërkon që niveli i rentës të përcaktohet në përqindje e jo të jetë fikse (u ndryshua ne fikse ne paketën fiskale 2016), pasi çmimi i mineraleve ndryshon shpesh.
“Në kushtet që po kalon industria Minerare, ku çmimet e tregut të mineraleve janë në minimum historik, sugjerojmë që pas kthimit të gjithë normave të rentës në përqindje, duhet që përqindja e rentës të ulet deri në përgjysmim të saj në raport me nivelin aktual”, ka kërkuar Gjiknuri, ministrisë së Financave.
Për aplikimin e rentës minerare në sektorin hidrokarbur, ministria Gjiknuri ka kërkuar që të përjashtohen nga renta “nënproduktet”, pasi në asnjë rast, nuk mund të paguhet rente për nënproduktet e naftës bruto (si psh për diezelin apo benzinën). i njëjti parashikim duhet bërë në gjithë tekstin e projektvendimit.
