Schmidt e konfirmon: Do të jap dorëheqjen si Përfaqësues i Lartë i Bosnjës! Kallas: BiH nuk duhet të rrëshqasë nga rruga

Christian Schmidt ka konfirmuar se do të japë dorëheqjen si Përfaqësues i Lartë Ndërkombëtar në Bosnje dhe Hercegovinë. Lajmi u njoftua këtë të hënë nga Zyra e Përfaqësuesit të Lartë në një deklaratë zyrtare. Ky vendim i Schmidt vjen pas pothuajse pesë vitesh në detyrë.

Sipas ZPL-së, Schmidt mori një vendim personal për t’i dhënë fund shërbimit të tij në zbatimin e paqes në Bosnjë dhe Hercegovinë. Ai tashmë e ka informuar Bordin Drejtues të Këshillit për Zbatimin e Paqes për vendimin e tij dhe ka kërkuar që të nisë procedura për emërimin e pasardhësit të tij.

Schmidt mësohet se do të vazhdojë të kryejë detyrat e tij gjatë gjithë procesit të përzgjedhjes së kreut të ardhshëm të institucionit.

Schmidt tha se mandati i tij ishte i dyti më i gjatë në historinë e OHR-së. Duke reflektuar mbi kohën e tij në detyrë, ai tha se ishte bërë përparim i konsiderueshëm në përmirësimin e funksionalitetit të institucioneve të Bosnjës dhe Hercegovinës, por theksoi se ende duhet bërë shumë më tepër që vendi të arrijë aspiratat e tij euroatlantike.

Edhe pse Schmidt kishte shprehur shpresën se largimi i tij do të përkonte me zbatimin me sukses të axhendës “5+2” dhe mbylljen përfundimtare të ZPL-së, Bosnja dhe Hercegovina ende nuk ka zbatuar reforma kyçe. Për këtë arsye, ZPL tha se puna e saj mbetet thelbësore për vendin.

Schmidt u bëri thirrje qytetarëve dhe udhëheqësve politikë nga të dy entitetet dhe të gjitha nivelet e qeverisjes që të intensifikojnë përpjekjet dhe të punojnë me pasardhësin e tij për zbatimin e reformave dhe arritjen e përparimit kyç në rrugën drejt integrimit euroatlantik.

Schmidt shtoi se do të nevojiten përpjekje të mëtejshme në vitet e ardhshme për të zbatuar të gjitha vendimet e Gjykatës Evropiane të të Drejtave të Njeriut dhe Gjykatës Kushtetuese të Bosnjës dhe Hercegovinës.

Shefja e politikës së jashtme të Bashkimit Evropian, Kaja Kallas ka reaguar duke u shprehur se ministrat e jashtëm të BE-së kishin diskutuar dorëheqjen e paralajmëruar të Schmidt, duke paralajmëruar se Bosnja dhe Hercegovina nuk duhet të lejohet të largohet nga rruga e saj evropiane.

Kallas shtoi se Ballkani Perëndimor mbetet një prioritet strategjik për Bashkimin Evropian, me ministrat që i japin mbështetje politike bashkëpunimit më të thellë me rajonin në çështjet e jashtme, të sigurisë dhe të mbrojtjes.

“Lidhur me Bosnjën dhe Hercegovinën, diskutuam dorëheqjen e shpallur të Përfaqësuesit të Lartë Schmidt. Ministrat bien dakord se është në interes të BE-së që të mos e lejojë vendin të dalë nga rruga e tij drejt BE-së dhe se duhet të qëndrojmë së bashku për të gjetur një pasardhës,” tha Kallas.