Seancë plenare dhe protestë para Kuvendit, qytetarët thirren të mblidhen në orën 10:00

Kuvendi do të zhvillojë sot seancën plenare, e cila është parashikuar të nisë në orën 10:00. Në të njëjtën orë, jashtë godinës së Parlamentit, është njoftuar edhe zhvillimi i një proteste nga qytetarët dhe nismëtarët e saj.

Thirrja për tubimin u bë mbrëmjen e djeshme gjatë protestës së zhvilluar para Kuvendit, ku organizatorët u kërkuan qytetarëve t’u bashkohen sërish edhe këtë paradite.

“Nesër në orën 10:00 para Parlamentit, bashkohuni me ne”, u shpreh një nga nismëtarët gjatë tubimit të djeshëm.

Ndërkohë, në rendin e ditës të seancës plenare janë parashikuar shqyrtimi i një sërë projektligjesh dhe projektrezolutash, si dhe diskutime për çështje jashtë rendit të ditës.

Rendi i ditës në seancën plenare:

Miratimi i procesverbalit të seancës plenare të datës 18 qershor 2026.

Njoftime.

Shqyrtimi i projektligjit “Për kontrollet zyrtare dhe aktivitete të tjera zyrtare, të kryera për të garantuar zbatimin e legjislacionit për ushqimin dhe ushqimin për kafshë, të rregullimeve për shëndetin dhe mirëqenien e kafshëve, si dhe për shëndetin e bimëve e të produkteve për mbrojtjen e bimëve në Republikën e Shqipërisë”.

Shqyrtimi i projektrezolutave për vlerësimin e veprimtarisë për vitin 2025 të:

Komisionerit për Mbikëqyrjen e Shërbimit Civil;

Komisionerit për të Drejtën e Informimit dhe Mbrojtjen e të Dhënave Personale;

Departamentit të Administratës Publike;

Autoritetit të Konkurrencës;

Komisionit të Prokurimit Publik;

Autoritetit për Informimin mbi Dokumentet e Ish-Sigurimit të Shtetit;

Institutit të Studimeve për Krimet dhe Pasojat e Komunizmit;

Agjencisë së Sigurimit të Depozitave.

Diskutime për çështje jashtë rendit të ditës.