Sejko: Kreditimi për bizneset e vogla të marrë më shumë vëmendje, portofoli arriti në 720 mld lekë

Guvernatori i Gent Sejko, mori pjesë në aktivitetin për nënshkrimin e partneritetit të ri ndërmjet shtetit, sistemit bankar dhe sipërmarrjes shqiptare për Programin Kombëtar të Financimit të Ndërmarrjeve të Vogla dhe të Mesme “Dyfisho Sipërmarrjen Tënde”.

Gjatë fjalës së tij, Sejko deklaroi se kredia për sektorin privat ka njohur rritje të vazhdueshme në vitet e fundit, ndërsa theksoi se kredia bankare mbetet fluksi më i madh financiar në ekonomi.

Sipas tij, portofoli i kredisë për sektorin privat ka arritur në 720 miliardë lekë, ndërsa rritja e kreditimit ka qenë rreth 15% gjatë viteve të fundit.

“Portofoli i kredisë për sektorin privat shënoi vlerën e 720 mld lekëve. Kredia për sektorin privat ka shënuar rritje, 15% përgjatë viteve të fundit. Kredia bankare përbën fluksin më të madh në ekonomi. Këto zhvillime flasin për shërbim të rritur sasior të sektorit bankar. Sektori bankar ofron instrumente moderne pagese”, u shpreh Sejko.

Guvernatori vuri theksin edhe te nevoja për mbështetje më të madhe të ndërmarrjeve të vogla dhe të mesme, duke e konsideruar aksesin në financim si një faktor kyç për rritjen ekonomike dhe mirëqenien sociale.

Ai përmendi gjithashtu skemën e garancisë sovrane të miratuar nga qeveria, ndërsa e cilësoi inkurajues progresin e arritur gjatë dy viteve të fundit.

“Sektori bankar duhet të ketë më shumë vëmendje ndaj sektorit të ndërmarrjeve të vogla dhe të mesme dhe sektorit të bujqësisë. Inkurajoj edhe bizneset e vogla dhe të mesme që t’i drejtohen bankave për konsulencë”, deklaroi Sejko.