Sesioni i ri, Bardhi: Kuvendi po përdoret në interes të Ramës, zhduku 2.1 mln metër katrorë tokë shtetërore

Kreu i Grupit Parlamentar të Partisë Demokratike, Gazment Bardhi, ka akuzuar mazhorancën, në fjalën e mbajtur në nisje të sesionit të ri parlamentar, se po përdor Kuvendin për miratimin e ligjeve që, sipas tij, janë në interes të kryeministrit Edi Rama.

Bardhi u ndal te ligji për investimet strategjike, duke pretenduar se përmes këtij ligji qeveria i ka dhënë kryeministrit mundësinë për të disponuar mbi miliona metra katrorë tokë shtetërore.

“Ju e keni bërë këtë prej 13 vitesh. Kjo maxhorancë, nën drejtimin e Edi Ramës, ka noterizuar kapjen e shtetit dhe plaçkitjen e Shqipërisë”, deklaroi Bardhi.

Bardhi pretendoi gjithashtu se ligji për investimet strategjike i ka krijuar mundësi kryeministrit Rama që të japë pasuri publike për interesa private.

“Ju, me ligjin e investimeve strategjike, i keni dhënë Ramës mundësi të zhdukë për interesa thellësisht private dhe plotësisht të pista 2.1 milionë metra katrorë tokë shtetërore në zonat më të bukura të Shqipërisë”, u shpreh ai.

Në fjalën e tij, Bardhi u ndal edhe te çështja KAYO, për të cilën Partia Demokratike ka njoftuar më herët se do të paraqesë kërkesë për hetim parlamentar.

Ai akuzoi qeverinë se kompanitë shtetërore po përdoren për transferimin e pasurive dhe parave publike te subjekte private të përzgjedhura.

“Kompanitë shtetërore përdoren për të kaluar pasuritë dhe paratë publike te privatët e përzgjedhur. Ndërsa drejtësia ndëshkon ndonjë vartës, por nuk prek atë që drejton skemën, Edi Ramën”, tha Bardhi.

Duke iu referuar krijimit të KAYO-s, kreu i Grupit Parlamentar të PD-së pretendoi se vota e mazhorancës i ka dhënë një kompanie shtetërore kontroll mbi prodhimin dhe tregtimin e armëve, municioneve dhe teknologjive ushtarake.

Bardhi ngriti akuza edhe lidhur me strukturën e pronësisë së kompanisë, duke pretenduar se shteti zotëron 20% të aksioneve, ndërsa 80% i përket një subjekti privat të lidhur, sipas tij, me biznesmenin Ron Jefeti.

Partia Demokratike ka kërkuar që çështja KAYO të bëhet objekt i një hetimi parlamentar.