Sharanoviq: 66 kallëzime penale për krime mjedisore, Mali i Zi pësoi dëme prej 8,7 milionë eurosh

Siç njofton CdM, ministri i Punëve të Brendshme të Malit të Zi, Danilo Sharanoviq, ka deklaruar se vetëm gjatë këtij viti janë paraqitur 66 kallëzime penale në fushën e krimit ekologjik, me dëme të shkaktuara prej rreth 8,7 milionë eurosh. Sharanoviq ka marrë pjesë në punimet e Kongresit të 15-të të Kombeve të Bashkuara për parandalimin e krimit dhe drejtësinë penale, i cili po mbahet nga 25 shtatori deri më 1 tetor në Abu Dhabi.

Sipas Ministrisë së Punëve të Brendshme, të cituar nga CdM, Sharanoviq ka folur në sesionin e nivelit të lartë me temën “Avancimi i strategjive inovative dhe të bazuara në prova për parandalimin e krimit me qëllim zhvillimin social, ekonomik dhe ekologjik”. Ai ka theksuar se bota po përballet me transformimin e aktiviteteve kriminale, të cilat rrezikojnë jo vetëm individët dhe institucionet, por edhe ekosistemet dhe stabilitetin global.

Sharanoviq ka nënvizuar veçanërisht se krimi ekologjik është bërë një nga format më fitimprurëse të krimit të organizuar, ndërsa krimi ekonomik minon besimin e qytetarëve dhe i shkakton dëme të mëdha buxheteve shtetërore, shkruan CdM.

Ai ka prezantuar masat që Mali i Zi ka ndërmarrë tashmë, përfshirë formimin e njësive të specializuara për luftën kundër formave komplekse të krimit ekonomik dhe krimit ekologjik. Sipas tij, Mali i Zi merr pjesë aktivisht edhe në operacionet ndërkombëtare si “Thunder” dhe “Open WiSE”.

“Jam i bindur se vetëm me përpjekje të përbashkëta, përmes strategjive globale inovative dhe strategjive kombëtare të harmonizuara, mund t’i bëjmë shoqëritë tona më rezistente ndaj krimit ekologjik dhe ekonomik. Me aktivitete adekuate parandaluese garantojmë mbrojtjen e qytetarëve dhe krijojmë themelet e zhvillimit dhe përparimit të qëndrueshëm – si për ne, ashtu edhe për brezat që vijnë”, ka thënë Sharanoviq. Sipas MUP-it, në Kongres kanë marrë pjesë delegatë nga më shumë se 110 vende, çka organizatorët e konfirmojnë si tubimin më të madh në historinë 71-vjeçare të Kongresit, njoftoi CdM.