SHBA – 25 vjet nga tragjedia, 2 977 flamuj për viktimat e sulmeve të 11 Shtatorit

– Një fushë me 2 977 flamuj, nga një për çdo punonjës të shërbimeve të emergjencës dhe civil të vrarë në sulmet terroriste të 11 Shtatorit 2001, është vendosur në Oak Brook, ku familjarë, vullnetarë dhe vizitorë janë mbledhur për të nderuar viktimat dhe për të kujtuar historitë e tyre, shkruan abc7chicago.com.

Mes vizitorëve ishte edhe Sue Mladenik, e cila kërkoi mes mijëra flamujve atë që mbante emrin e bashkëshortit të saj, Jeffrey Mladenik.

Ai ndodhej në bordin e fluturimit 11 nga Bostoni, avioni i parë që goditi Qendrën Botërore të Tregtisë mëngjesin e 11 Shtatorit.

Pas vdekjes së bashkëshortit, Sue mbeti e vetme për të rritur gjashtë fëmijët e tyre. Ajo tha se dhimbja e humbjes vazhdon të ndihet edhe 25 vjet më vonë.

“Është shumë e vështirë të shohësh fëmijët e tu duke vuajtur, ndërsa përpiqesh vetë të qëndrosh e fortë”, u shpreh ajo.

Vullnetarët po vendosin në shtyllat e flamujve shirita dhe karta me informacione për secilën prej viktimave.

“Pas secilit prej këtyre flamujve qëndron një person dhe një familje, njësoj si unë dhe familja ime”, tha ajo.

Shefi i Policisë së Oak Brook, Brian Strockis, tha se ”kujtimet e 11 Shtatorit mbeten ende të gjalla”.

Në kohën e sulmeve, ai ishte një oficer policie në fillimet e karrierës.

“Imazhet e policëve dhe zjarrfikësve që vrapuan drejt rrezikut, ndërsa të gjithë të tjerët po largoheshin, janë ngulitur në kujtesën e të gjithëve. Kjo është një mënyrë për t’i përkujtuar ata”, tha Strockis.

Jerry Christopherson, themeluesi i ekspozitës “Healing Field”, tha se e nisi këtë memorial menjëherë pas ngjarjeve të 11 Shtatorit dhe e ka organizuar në shumë prej përvjetorëve të sulmeve.

Sipas tij, vendosja e të dhënave personale për secilën viktimë ndihmon njerëzit të kuptojnë përmasat e tragjedisë.

“Përndryshe, është thjesht një numër. Një numër i tmerrshëm, por vetëm një numër”, tha Christopherson. Për vizitorë si Susan Caputo nga Nju Jorku, ekspozita është një kujtesë e fuqishme e jetëve të prekura nga sulmet. Caputo tha se më 11 Shtator punonte përballë Qendrës Botërore të Tregtisë.