SHBA – Gates: IA më e rrezikshme nga sa mendojmë

UASHINGTON, 26 gusht /ATSH-ANSA/ – Inteligjenca artificiale përbën një kërcënim serioz për punët dhe jetën e njerëzve dhe adresimi i rreziqeve të saj duhet të jetë prioriteti kryesor në mbarë botën, deklaroi biznesmeni dhe filantropisti i njohur amerikan, Bill Gates, i cili është edhe një nga pionierët e revolucionit kompjuterik.

“Në vitin 1933, gjatë Depresionit të Madh, papunësia në Shtetet e Bashkuara arriti në 25%. IA mund të mos i arrijë ato nivele, por ndikimi i saj nuk do të shterojë në një cikël ekonomik”, theksoi ai.

Në një intervistë me ”New York Times”, Gates denoncon industrinë e teknologjisë si nënvlerësuese të kërcënimeve të IA-së sepse miliarda dollarë janë në lojë.

“Privatisht, ata që e kuptojnë se sa shumë po përmirësohet kjo teknologji janë shumë të shqetësuar”, thotë Gates, duke theksuar se pak në industrinë e teknologjisë janë të gatshëm ta pranojnë këtë publikisht.

“Tani po i thonë njëri-tjetrit ‘mos e thuaj se na dëmton dhe po përpiqemi të mbledhim miliarda dollarë”, shtoi ai.

Gates shpjegon se alarmi i tij lidhet me faktin se inteligjenca artificiale i ka tejkaluar pritjet e tij dhe se industria ka injoruar disa ngjarje të rëndësishme – siç është mundësia që inteligjenca artificiale t’i shpëtojë kontrollit të krijuesve të saj – që në të kaluarën do të kishin justifikuar më shumë kujdes./ a.jor.