SHBA – Gjykata federale bllokon përkohësisht rregullat e Trump për votimin me postë

UASHINGTON, 28 gusht /ATSH-DPA/ – Një gjyqtare federale amerikane bllokoi përkohësisht urdhrin e presidentit, Donald Trump që shtrëngonte rregullat e votimit me postë pak më shumë se dy muaj para zgjedhjeve të mesit të mandatit.

Rregullat ishin një “rregullore me shumë gjasa jokushtetuese për të cilën zbatimi është praktikisht i pamundur në lidhje me zgjedhjet e mesit të mandatit të vitit 2026”, shkroi gjyqtarja Indira Talwani.

Ajo tha se masat nuk mund të zbatoheshin realisht sepse shtetet e para pritet të fillojnë të dërgojnë fletëvotime me postë që javën e ardhshme.

Rregullat e reja do t’i jepnin Shërbimit Postar të SHBA-së (USPS) një rol qendror në mbikëqyrjen e votimit me postë. Shtetet do të duhet të paraqesin modelin e zarfeve të tyre të fletëvotimit me postë për miratim, ndërsa USPS do t’u dorëzonte materialet e votimit vetëm personave të listuar në listat e votuesve të ofruara nga shtetet.

Republikanët i kanë mbrojtur masat si të nevojshme për të parandaluar mashtrimet e supozuara zgjedhore, ndërsa kritikët thonë se Trump po kërkon ta bëjë votimin me postë më të vështirë.

Votuesit demokratë në përgjithësi kanë qenë më të prirur sesa republikanët të votojnë me postë.

Zgjedhjet e mesit të mandatit të 3 nëntorit do të vendosin të gjitha vendet në Dhomën e Përfaqësuesve dhe rreth një të tretën e Senatit.

Me republikanët që mbajnë shumicë të ngushtë në të dyja dhomat, kontrolli i Kongresit mund të varet vetëm nga një numër i vogël garash. Humbja e njërës dhomë do ta bënte shumë më të vështirë për Trumpin të shtynte përpara axhendën e tij politike.

Talwani më parë i kishte bllokuar rregullat, por Gjykata Supreme e hoqi atë urdhër të hënën për arsye procedurale në vend që të vendoste mbi ligjshmërinë e masave./ /os/ a.jor.