SHBA – Trump: Lufta në Ukrainë duhet të marrë fund

UASHINGTON, 22 shtator /ATSH-ANSA/ – Kjo luftë absurde dhe e pafundme me Ukrainën duhet të marrë fund, është paralajmërimi i dhënë nga presidenti amerikan Donald Trump, ndërsa në Nju-Jork po zhvillohet një sërë takimesh në kuadër të Asamblesë së Përgjithshme të OKB-së.

“Për shkak të luftës me Ukrainën, Rusia ka humbur kontrollin mbi industrinë e saj të naftës ‘diesel’. Shumë nga rafineritë e saj të naftës janë shkatërruar dhe janë, të paktën përkohësisht, jashtë funksionit”, deklaroi Trump në platformën e tij të rrjeteve sociale ‘Truth’.

Këtu buron edhe thirrja që kreu i Shtëpisë së Bardhë i drejtoi Moskës për t’i dhënë fund konfliktit – një thirrje që u mbështet menjëherë nga Volodymyr Zelensky.

“Po, vërtet, kjo luftë ruse kundër Ukrainës dhe kundër arsyes së shëndoshë duhet të marrë fund,” shkroi presidenti ukrainas në X, duke shtuar se “ka gjithashtu ide në tryezë për ta afruar paqen, duke filluar me hapa të fuqishëm për uljen e tensioneve.”

Megjithatë, Trump kishte bërë një kërkesë po aq urgjente gjatë një telefonate me vetë Zelenskyn të dielën.

Sipas Axios, presidenti amerikan – i shqetësuar thellësisht për rritjen e çmimeve globale të karburantit, dhe rrjedhimisht të çmimeve në SHBA, vetëm pak javë para zgjedhjeve të ndërmjetme – i kërkoi vazhdimisht liderit ukrainas të ndalonte sulmet ndaj rafinerive ruse.