SHBA – Trump nderon Lindsey Graham në ceremoninë përkujtimore

– Presidenti i SHBA-së, Donald Trump i bëri homazhe senatorit republikan të ndjerë, Lindsey Graham gjatë një ceremonie përkujtimore të mbajtur dje në Katedralen Kombëtare të Uashingtonit.

“Për më shumë se 30 vjet, asgjë me rëndësi nuk ndodhte në këtë kryeqytet pa e ditur Lindsey Graham dhe asgjë me peshë në botë, nuk ndodhte pa pasur ai një qëndrim për të”, tha Trump për aleatin e tij.

Ai e përshkroi Graham si, një mik të dashur, një vëlla të përkushtuar, një burrë shteti të respektuar, një figurë gjigante të Senatit të Shteteve të Bashkuara të Amerikës dhe një amerikan të jashtëzakonshëm.

Graham ndërroi jetë në fillim të këtij muaji, në moshën 71-vjeçare, si pasojë e komplikacioneve të shkaktuara nga një sëmundje e enëve të gjakut.

Ai u zgjodh për herë të parë, në Dhomën e Përfaqësuesve të SHBA-së në vitin 1994, duke përfaqësuar shtetin e Karolinës së Jugut, ndërsa në vitin 2003 u bë anëtar i Senatit.

Graham konsiderohej një njohës me përvojë i politikës së jashtme dhe ishte i angazhuar në çështje, që lidhen me zonat kryesore të konflikteve.

Vetëm pak ditë para vdekjes, ai ndodhej në Kiev, ku i tha presidentit ukrainas, Volodymyr Zelensky, se Shtëpia e Bardhë mbështeste projektligjin e ri për vendosjen e sanksioneve ndaj Rusisë.

Ai kishte bërë gjithashtu thirrje për ndryshim të regjimit në Iran dhe kishte mbështetur sulmet ushtarake të SHBA-së dhe Izraelit ndaj këtij vendi.

Në ceremoninë përkujtimore morën pjesë edhe kryeministri izraelit, Benjamin Netanyahu dhe presidenti ukrainas, Volodymyr Zelensky, të cilët më herët gjatë ditës zhvilluan takime dypalëshe me Trump në Shtëpinë e Bardhë. /