SHBA – Trump njofton papritur një fjalim para kombit

UASHINGTON, 13 korrik /ATSH-AFP/ – Presidenti amerikan, Donald Trump njoftoi sot se do të mbajë një fjalim televiziv të enjten në mbrëmje, ndërsa përplasjet me Iranin kanë rifilluar me një intensitet të paparë prej javësh.

“Presidenti Trump do t’i drejtohet kombit të enjten në mbrëmje në orën 21:00 (01:00 GMT, të premten)”, shkroi presidenti amerikan në platformën e tij Truth Social.

Trump nuk zbuloi se cilat tema do të trajtonte gjatë fjalimit të tij.

Kjo ndërhyrje vjen ndërsa tensionet midis Shteteve të Bashkuara dhe Iranit po rriten në luftën që filloi më 28 shkurt me sulmet ajrore izraelito-amerikane dhe po trondit Lindjen e Mesme dhe ekonominë globale.

Presidenti amerikan deklaroi gjithashtu në Truth Social se Shtetet e Bashkuara tani do të jenë “rojet e Ngushticës së Hormuzit” dhe se do t’u imponojnë anijeve “një tarifë të barabartë me 20% të vlerës së ngarkesës” që kalojnë nëpër këtë rrugë ujore strategjike, e cila i nënshtrohet ligjit ndërkombëtar që synon të garantojë lirinë e lundrimit.

Ai njoftoi gjithashtu rivendosjen e bllokadës së ngushticës, me ushtrinë amerikane që specifikoi se do të hynte në fuqi në orën 20:00 GMT të martën.

Fjalimi i fundit televiziv i Donald Trump ishte më 1 prill, kur ai justifikoi për herë të parë ndërhyrjen amerikane në Iran, më shumë se një muaj pas fillimit të fushatës së bombardimeve izraelito-amerikane./ a.jor.